कॉर्न अँड पनीर टोस्ट - Corn Paneer Toast

Corn Paneer Toast in English

वाढणी: ४ ते ५ ब्रेड

साहित्य:
३/४ कप मक्याचे दाणे (उकडलेले)
१/४ कप पनीर (छोटे तुकडे)
४ व्हाईट ब्रेड स्लाईस
१ टिस्पून बटर
१/४ कप + २ टेस्पून दुध
१ हिरवी मिरची बारीक चिरून
१/२ टिस्पून कॉर्न फ्लोअर
आवडीनुसार किसलेले चिज
चवीनुसार मिरपूड आणि मिठ

कृती:
१) पॅन गरम करून त्यात बटर घालावे. बटर वितळले कि त्यात हिरवी मिरची घालावी. उकडलेले मक्याचे दाणे थोडावेळ परतून घ्यावे.
२) नंतर परतलेले मक्याचे दाणे बाजूला काढून ठेवावे. नंतर त्याच पॅनमध्ये पाव कप दुध घालून ढवळावे. गॅस मंद करून ठेवावा. २ टेस्पून गार दुधात थोडे कॉर्न फ्लोअर घालून मिक्स करावे व गरम दुधात घालावे. मध्यम आचेवर उकळू द्यावे, हळूहळू घट्टसर सॉस तयार होईल. सॉस घट्ट होताना ढवळत राहावे, गुठळी राहू देवू नये. यात परतलेले मक्याचे दाणे घालावेत व पनीर घालावे, निट मिक्स करावेत. गॅस बंद करून या मिश्रणात थोडे मिठ घालावे.
३) ओव्हन ३५० F वर प्रिहीट करावे.
४) ब्रेड स्लाईसवर मक्याचे तयार मिश्रण लावावे. वरून आवडीनुसार चिज घालावे. ५ मिनीटे बेक करावे. ब्रेडवरील चिज वितळले आणि ब्रेड जरा क्रिस्पी झाला कि बाहेर काढावे. थोडे मिठ-मिरपूड भुरभूरवावी. टॉमेटो सॉसबरोबर गरमागरम सर्व्ह करावे. हे टोस्ट हिरव्या चटणीबरोबरही खुप छान लागतो.

Labels:
Corn Toast, Corn Recipes, Corn Snacks

ग्वाकामोले - Guacamole

Guacamole in English

आवोकाडो हे खुप पौष्टीक आणि चविष्ट असे फळ आहे. भारतात आवोकाडो पाहायला मिळत नाही पण अमेरीकेतील बाजारात तरी अगदी सहज available असतो. कॉर्न चिप्सबरोबर आवोकाडो डीप किंवा ग्वाकामोले संध्याकाळच्या खाण्यासाठी चांगला आणि healthy पर्याय आहे. त्याचीच ही झटपट कृती.
आवोकाडोच्या औषधी गुणधर्मांविषयी वाचण्यासाठी इथे क्लिक करा - Avocado Health Benefits.

वाढणी: २ जणांसाठी

साहित्य:
१ पिकलेला आवोकाडो (टीप १)
१/४ कप लाल कांदा, एकदम बारीक चिरलेला
१/४ कप लालबुंद टोमॅटो, बारीक चिरून
१/४ कप कोथिंबीर, बारीक चिरून
२ टिस्पून लिंबू रस
१ लहान हिरवी मिरची, बारीक चिरून
किंचीत मिठ
१/८ टिस्पून मिरपूड

कृती:
१) आवोकाडोमधील गर काढून घ्यावा. एका बोलमध्ये आवोकाडोमधील गर काट्याने (Fork) मॅश करून घ्यावा. पूर्ण मॅश करू नये, किंचीत गुठळ्या राहू द्याव्यात.
२) मॅश केलेल्या आवोकाडोमध्ये लिंबाचा रस, चिरलेला कांदा, टोमॅटो, कोथिंबीर, आणि मिरची घालून मिक्स करावे. थोडे मिठ आणि मिरपूड घालावी.
ग्वाकामोले किंवा आवोकाडो डिप, टॉर्टीया चिप्सबरोबर खुपच छान लागतो तसेच मेक्सिकन राईस आणि इतर मेक्सिकन डिशेस बरोबर मस्त जमून जातो.

टीप:
१) कच्च्या आवोकाडोचे साल गर्द हिरवे असते, तर पिकलेल्या आवोकाडोचे साल काळपट हिरवे झालेले असते. पण आवोकाडो घेताना खुप जास्त पिकलेलाही घेऊ नये, निट तपासून घ्यावा. सर्व बाजूंनी firm असला पाहिजे. कधी कधी जास्त पिकलेला आवोकाडो आतून खराब निघतो, तसेच चवीलाही चांगला लागत नाही.
२) ग्वाकामोले जर थोडा थंड करायचा असेल तर ग्वाकामोले एका काचेच्या बोलमध्ये ठेवून त्यावर प्लास्टिक रॅप करून तासभर फ्रिजमध्ये ठेवावे म्हणजे काळपट पडणार नाही. तासाभराने थंड ग्वाकामोले, टॉर्टीया चिप्सबरोबर सर्व्ह करावे.
३) कांदा टोमॅटोचे प्रमाण आवडीनुसार कमीजास्त करावे.
४) खायच्या आधी टॉर्टीया चिप्स ओव्हनमध्ये ५ मिनीटे बेक करावे, गरम चिप्समुळे चव खुप छान लागते आणि चिप्स जास्त कुरकूरीतही लागतात.

इडली रवा खांडवी - Idli Rava Khandavi

Idli Rava Khandvi in English


साहित्य:
१/२ कप इडली रवा
१/२ कप गूळ
१ कप पाणी (टीप)
२ चमचे तूप
१/२ टिस्पून वेलचीपूड
१/४ कप ओलं खोबरं

कृती:
१) तूपावर इडली रवा गुलाबीसर रंगावर भाजून घ्यावा. १ कप पाणी उकळवावे आणि भाजलेल्या रव्यात घालावे. १ वाफ काढावी.
२) वाफ काढून झाली कि त्यात नारळ, वेलचीपूड आणि गूळ घालावा व परत १-२ वेळा वाफ काढावी. थाळीला तूपाचा हात लावून घ्यावा. खांडवीचे मिश्रण थाळीत ओतून थापून घ्यावे. व वड्या पाडाव्यात.

टीप:
१) बाजारात इडली रवा वेगवेगळ्या क्वालिटीमध्ये मिळतो. कधीकधी बारीक असतो तर कधी जाडसर असतो. तेव्हा पाण्याचे प्रमाण पुढीलप्रमाणे कमी जास्त करावे.
बारीक रवा = १ भाग रवा : २ भाग पाणी
जाड रवा = १ भाग रवा : अडीचपट पाणी

Labels:
Idli Rava Khandvi, Khandvi recipe, Khandavi

Other Related Recipes

उपवासाची खांडवीची

बटाटापूरी - Batata Puri

Batata Puri in English

In India, Sabudana or Sago has a unique importance during Fasting. Khichdi, Vada, Kheer (Pudding) , Thalipith (Pancakes) made of Sabudana taste just amazing. Sabudana Vada is favorite in India, especially in Maharashtra because of its delicious taste and crispy texture.
Batata Puri (Potato Puri) is a version of Sabudana Vada. But Batata Puris are more crispy than Sabudana Vada. This recipe would be a nice alternative who fasts once in a week and searching something new to try other than routine fasting food.

उपवासाला आपण घरी साबुदाणे वडे बर्‍याचदा करतो, बटाटापुरी हि साबुदाणा वड्याच्या साहित्यापासूनच बनवली जाते पण पदार्थांचे प्रमाण आणि पद्धत थोडी निराळी असते. तसेच चवीलाही थोडी वेगळी आणि खुसखूशीत लागते. नक्की करून पाहा !!

वाढणी: मध्यम १२ पुर्‍या

साहित्य:
२ मोठे बटाटे, उकडलेले
१/२ कप साबुदाणा
७ ते ८ मिरच्या
१/४ कप कोथिंबीर, चिरून
१/२ टिस्पून जिरे
३ टेस्पून शेंगदाणा कूट
१ टिस्पून जिरेपूड
१ ते २ टेस्पून शिंगाडा पिठ (टीप)
चवीपुरते मिठ
तळण्यासाठी तेल

कृती:
१) १/२ कप साबुदाणा पाण्यात भिजवावा. अधिकचे पाणी काढून टाकावे. नंतर किंचीत पाणी घालावे. साबुदाण्याच्यावर १/२ सेमी येईल इतपत पाण्याची पातळी ठेवावी. साधारण ३-४ तास अशाप्रकारे भिजवून ठेवावे. भांडे वरून झाकावे.
२) मिक्सरमध्ये ७-८ हिरव्या मिरच्या, कोथिंबीर, जिरे आणि थोडे मिठ घालून बारीक करावे. पाणी घालू नये. जर मिक्सर नसेल तर मिरच्या आणि कोथिंबीर बारीक चिरून घ्यावी.
३) शिजवलेले बटाटे किसून घ्यावे. त्यात मिरची-कोथिंबीरीचा ठेचा, शेंगदाणा कूट, भिजवलेले साबुदाणे, जिरेपूड आणि शिंगाडा पिठ घालून निट मळून गोळा बनवावा. चव पाहुन, लागल्यास मिठ घालावे.
४) साधारण दिड इंचाचे गोळे करावे. तेल तापत ठेवावे. तेल तापले कि आच मिडीयम हायवर ठेवावी. एक प्लास्टिकचा जाड तुकडा घ्यावा. त्याला तेलाचा हात लावावा. प्रत्येक गोळा त्यावर जाडसर थापावा आणि मध्यभागी बोटाने भोक पाडावे. पातळ थापू नये, नाहीतर तेलात टाकल्यावर पुरी तुटते आणि विरघळते. (टीप)
५) पुरी तेलात टाकल्यावर ती झार्‍याने अजिबात पलटू नये. पुरी पलटली ती हमखास तुटते. पुरी जरा तळली गेल्यावर थोडा firmness येतो. त्यावेळी झार्‍याने अलगद तेलात बुडवावी म्हणजे वरच्या बाजूलाही छान ब्राऊन रंग येईल.
तळलेल्या पुर्‍या चटणीबरोबर सर्व्ह कराव्यात.
टीप:
१) पुरी तेलात टाकल्यावर तुटत असेल तर मळलेल्या पिठात एखादा चमचा शिंगाडा पिठ वाढवावे.
२) शिंगाडा पिठ घरात available नसेल आणि उपवासही नसेल तर शिंगाड्याऐवजी तांदूळाचे पिठ वापरले तरी चालते.
३) साबुदाणा खुप चिकट भिजवू नये, पुर्‍या तळताना त्या तेलात विरघळतात.
4) तिखटाच्या आवडीप्रमाणे मिरच्यांचे प्रमाण कमीजास्त करावे.

रताळे किस - Ratale Kis

Ratale Kis in English

वाढणी: २-३ जणांसाठी


साहित्य:
साडेचार कप रताळ्याचा किस (३ मोठी रताळी)
१ टेस्पून तूप
१/२ टिस्पून जिरे
४ हिरव्या मिरच्या, बारीक चिरून किंवा २-३ सुक्या लाल मिरच्या
१/४ कप कोथिंबीर
१/२ टिस्पून जिरेपूड
3 टेस्पून शेंगदाण्याचा कूट
चवीपुरते मिठ
१/२ टिस्पून साखर
२ टेस्पून कोथिंबीर
१ टेस्पून लिंबाचा रस
२ टेस्पून ओल्या नारळाचा चव

कृती:
१) रताळी स्वच्छ धुवून घ्यावीत. मी शक्यतो साले काढत नाही फक्त रताळ्यावर काळपट डाग असतील तेवढे सुरीने काढून टाकते. पण जर वाटले तर साल काढून मग किसावे. रताळी किसताना जवळ एक गार पाणी भरलेले पातेले तयार ठेवावे. अर्धे रताळे किसले कि या पाण्यात टाकावे म्हणजे किसलेले रताळे काळे पडणार नाही.
२) कढईत तूप गरम करावे त्यात जिरे, मिरच्या घालून फोडणी करावी. तसेच १/४ कप कोथिंबीर फोडणीस घालावी. लगेच पाण्यात घातलेले रताळे किस दोन्ही हातांनी पिळून कढईत टाकावे. जिरेपूड घालून निट परतावे. आधी मिठ घालू नये कारण रताळ्याचा किस शिजत आला कि बराच आळतो आणि मिठाचा अंदाज चुकू शकतो.
३) मध्यम आचेवर रताळ्याचा किस झाकण न ठेवता शिजू द्यावा. कालथ्याने निट ढवळावे. ६-७ मिनीटांत रताळ्याचा किस आळतो तसेच अर्धवट शिजतो. त्यात थोडे मिठ, साखर, शेंगदाण्याचा कूट घालून परतावे. थोडावेळ झाकण ठेवून शिजू द्यावे.
रताळ्याचा किस तयार झाला कि त्यात लिंबाचा रस, कोथिंबीर आणि खवलेला नारळ घालून दह्याबरोबर सर्व्ह करावे.

Labels:
Ratalyacha Kis, Potato hash, Indian sweet Potato hash, ratale kees

आलू मुंगोडी चाट - Aloo Mungodi chat

Aloo Mungodi Chat in English

वाढणी: २ ते ३ जणांसाठी
वेळ: ४० मिनीटे (मूग भिजलेले असल्यास)

साहित्य:
मुगभजीसाठी:::
१/२ कप हिरवी मुगडाळ (सालासकट)
३-४ हिरव्या मिरच्या, ४ लसूण पाकळ्या
१/२ टिस्पून लाल तिखट, १/२ टिस्पून हळद, १ टिस्पून जिरेपूड
चवीपुरते मिठ
तळण्यासाठी तेल
बटाटा:::
२ मध्यम बटाटे, उकडून, १ टिस्पून बटर, चवीपुरते मिठ, १ टिस्पून लिंबाचा रस
लाल चटणी:::
लाल मिरच्या भिजवण्यासाठी वेळ नव्हता म्हणून मी लाल चटणी पुढील प्रमाणे केली
२ टिस्पून काश्मिरी लाल तिखट, १ टिस्पून धणेपूड, २-३ टेस्पून पाणी
इतर साहित्य:::
२ टेस्पून हिरवी चटणी
१/४ कप चिंचेची चटणी
२ टिस्पून चाट मसाला
१ टिस्पून जिरेपूड
१/२ कप दही
१/२ टिस्पून काळे मिठ
साधे मिठ चवीनुसार
२ टेस्पून बारीक चिरलेली कोथिंबीर, १/४ कप बारीक शेव, १/४ कप बारीक चिरलेला कांदा
१/४ टिस्पून लाल तिखट

कृती:
१) चिंचेची चटणी आणि हिरवी चटणी तयार ठेवावी. दही फेटून घ्यावे.
२) मुगभजीसाठी हिरवी मुगडाळ ३ तास भिजत घालावी. त्यातील पाणी काढून टाकावे. मिक्सरमध्ये भिजवलेली हिरवी मुगडाळ, हिरव्या मिरच्या, लसूण पाकळ्या, लाल तिखट, हळद, जिरेपूड, चवीपुरते मिठ घालून बारीक करावे. तेल गरम करून त्यात छोट्या भजी तळून घ्याव्यात.
३) उकडलेले बटाटे सोलून त्याचे छोटे तुकडे करून घ्यावेत. एक पॅन गरम करून बटर घालावे त्यात बटाट्याच्या फोडी घालून परतावे. गॅस मध्यम ठेवावा. मिठ घालावे आणि गॅस बंद करून लिंबाचा रस घालावा.
४) प्लेटमध्ये आधी भज्या घालाव्यात त्यावर परतलेले बटाटे, २ चमचे दही, हिरवी चटणी, चिंचेची चटणी, लाल चटणी, अजून थोडे दही, चाट मसाला, जिरेपूड, काळे मिठ, साधे मिठ, लाल तिखट घालावे. शेवटी कोथिंबीर, बारीक शेव घालून सजवावे.

Labels:
Dahi Chat, Pakoda Chat, Moong Bhajji Chat, Bombay chat food, Aloo Chat

दही बटाटा पुरी - Dahi Batata Puri

Dahi Batata Puri in English

पाणीपुरी हा माझा फार आवडीचा पदार्थ आहे, घरी पुर्‍या केल्या कि मुद्दाम जास्त करून ठेवायच्या मग काही वेगळे चाटचे पदार्थही बनवता येतात. दहीपुरी हा त्याच कॅटेगरीतील पदार्थ.बनवायलाही सोपा!! नक्की करून पाहा..

वाढणी: २ प्लेट


साहित्य:
१४ पाणीपुरीच्या पुर्‍या
१/२ कप शिजवून किसलेला बटाटा
१/२ कप चिरलेला कांदा
१/२ कप चिरलेला टोमॅटो
३/४ कप घट्ट दही
१/२ कप चिंचगूळाची चटणी
१/४ कप हिरवी चटणी
आवडीनुसार चाट मसाला
काळे मिठ
मिठ
१/२ टिस्पून साखर
सजावटीसाठी कोथिंबीर

कृती:
१) पुरीच्या पातळ बाजूला भोक पाडून दोन प्लेटमध्ये प्रत्येकी ७ पुर्‍या ठेवाव्यात.
२) दही घोटून घ्यावे. त्यात ३ ते ४ चमचे पाणी घालून किंचीत सैलसर बनवावे. त्यात थोडे मिठ आणि साखर घालून ढवळावे.
३) पुर्‍यांमध्ये थोडा बटाटा भरावा, थोडे मिठ पेरून नंतर कांदा आणि टोमॅटो भरावा. वरून चिमूटभर काळे मिठ भुरभुरावे. चिंचगूळाची चटणी आणी हिरवी चटणी घालून चाटमसाला भुरभुरावा. प्रत्येक पुरीवर दही घालावे आणि कोथिंबीर घालून सर्व्ह करावे.

टीप:
१) आवडीनुसार सजावटीसाठी नायलॉन शेवही घालू शकतो.
Labels:
Dahi Puri, Chat food, Mumbai street food, Sev puri

मक्याचा चिवडा - Corn Flakes chivda

Corn Flakes Chivda in English

वाढणी: साधारण ८ कप



साहित्य:
७ कप कॉर्न फ्लेक्स (Plain) (टीप ३,४ पहा)
१/४ कप तेल
फोडणीसाठी: १/२ टिस्पून मोहोरी, १/२ टिस्पून जिरे, १/४ टिस्पून हिंग, १/२ टिस्पून हळद, १ टिस्पून लाल तिखट, ६-७ पाने कढीपत्ता
६-७ हिरव्या मिरच्या, बारीक चिरून
२/३ कप शेंगदाणे
१/४ कप बेदाणे
२ टिस्पून धणे-जिरे पूड
१ टेस्पून आमचूर पावडर
मिठ आणि साखर चवीनुसार

कृती:
१) मोठ्या पातेल्यात १/४ कप तेल गरम करावे. त्यात शेंगदाणे फ्राय करून घ्यावे. शेंगदाणे एका ताटलीत काढून ठेवावेत.
२) आच मध्यम करावी. गरम तेलात मोहोरी, जिरे, हिंग, हळद, लाल तिखट आणि हिरव्या मिरच्या घालून फोडणी करून घ्यावी. कढीपत्ता घालून तडतडू द्यावा. बेदाणे घालावेत काही सेकंद परतून शेंगदाणे आणि कॉर्नफ्लेक्स घालावेत. कॉर्नफ्लेक्स ६-७ भागात घालावेत. एकदम घालू नयेत, जेणेकरून तेल सर्व कॉर्नफ्लेक्सना लागेल.
३) गॅस एकदम मंद ठेवून चिवडा निट मिक्स करून घ्यावा. आता धणे-जिरेपूड, आमचूर पावडर, मिठ आणि साखर (मी ३ टिस्पून साखर वापरली होती) घालून मिक्स करावे.
जर नॉनस्टिक भांडे वापरत असाल आणि भांड्याला कान असतील तर दोन्ही कान पकडून चिवडा सांडू न देता सावकाशपणे पाखडावा. म्हणजे सर्व जिन्नस छान मिक्स होतील.
४) गॅस बंद करून चिवडा निवू द्यावा. चिवडा निवला कि हवाबंद डब्यात भरून ठेवावा.

टीप:
१) शेंगदाण्याप्रमाणेच सुक्या खोबर्‍याचे पातळ काप आणि चण्याचे डाळं तळून चिवड्यात वापरू शकतो.
२) जर मिरच्या वापरायच्या नसतील तर फक्त लाल तिखट वापरू शकतो.
३) काही सिरीयल्स (cereal) पातळ तर काही जरा जाड असतात (मी आणलेल्या सिरीयल्स पातळ होत्या). त्यावरती तेल किती लागेल हे अवलंबून असते, म्हणून एकावेळी सर्व सिरीयल्स तेलात न घालता एकेक कप घालावेत.
४) सिरीयल्समध्ये साखरेचे प्रमाण कमीतकमी असावे, तेव्हा सिरीयल (cereal) निवडताना खोक्यावर ’Nutrition Label' वर साखरेचे प्रमाण बघुन घ्यावे. शुगर फ्रोस्टेड सिरीयल्स (Sugar Frosted Cereals) वापरू नयेत. त्यामुळे चिवडा खुप गोड होईल.

Labels:
Corn flakes chiwada, Diwali Chivda recipe, Makyacha Chivda, Makai Chivda

ओल्या नारळाच्या करंज्या - Karanji

Coconut Karanji in English

वाढणी: साधारण ११ करंज्या
वेळ: साधारण १ तास
दिवाळीसाठी ड्रायफ्रुट बेक करंजी

साहित्य:
::::सारण::::
सव्वा कप खोवलेला ओला नारळ
पाउण कप किसलेला गूळ
१/२ टिस्पून वेलची पूड
::::करंजी पिठ::::
पाउण कप मैदा
पाव कप रवा
१ टिस्पून साजूक तूप, पातळ केलेले
१/२ ते पाउण कप दूध
तळण्यासाठी तेल

कृती:
१) गूळ व नारळ एकत्र करून पातेल्यात, मध्यम आचेवर शिजवावे. वेलचीपूड घालावी आणि घट्टसर मिश्रण करावे. मिश्रण ओलसर असू नयेत नाहीतर करंज्या नरम पडतात.
२) करंजीच्या आवरणासाठी एका भांड्यात रवा आणि मैदा एकत्र करावा. तूप कडकडीत गरम करून मोहन घालावे. थोडे थंड झाले कि मोहन घातलेले तूप सर्व मैद्याला लागेल असे मिक्स करावे. अंदाजे घेत घेत गार दूध घालावे आणि घट्ट मळून घ्यावे. थोडा वेळ झाकून ठेवून द्यावे.
३) १५-२० मिनीटांनी थोडे दूधाचा हबका मारून पिठ जरा कुटून घ्यावे. पिठाचे एकेक इंचाचे गोळे करून घ्यावेत.
४) करंज्या वाळू नयेत म्हणून एक ताटली आणि एक ओला, पिळून घेतलेला कपडा तयार ठेवावा.
५) करंज्या करण्यासाठी पिठाची एक गोळी निट मळून घ्यावी. गोल आणि पातळसर पुरी लाटून घ्यावी. मध्यभागी एक चमचाभर नारळाचे सारण ठेवावे. पुरीच्या अर्ध्या कडेला किंचीत दूध लावावे म्हणजे दोन्ही कडा निट चिकटतील आणि तळताना करंजी फुटणार नाही. उरलेली रिकामी अर्धी बाजू दूध लावलेल्या बाजूवर आणून चिकटवावी. सारण बाहेर येणार नाही याची काळजी घ्यावी. कातणाने अधिकचे पिठ कापून घ्यावे. [माझ्याकडे कातण नव्हते म्हणून काट्याने (Fork) कडेवरती थोडे डिझाईन केले.]
६) करंजी करून झाली कि ती ताटलीत ठेवून वरून ओला कपडा टाकून झाकावी म्हणजे करंजी सुकणार नाही. अशाप्रकारे सर्व करंज्या करून घ्याव्यात.
७) तळणीसाठी तेल गरम करावे. मध्यम आचेवर करंज्या सोनेरी रंगावर तळून घ्याव्यात.

Labels:
Olya Naralachya Karanjya, Karanji recipe, Gujia Recipe, nevri, karjikayi, karanji

सोया ग्रॅन्युल्स कटलेट - Soya Cutlet

Soya Granules Cutlet in English


साहित्य:
१ कप न्युट्रेला सोया ग्रॅन्युल्स
(मी रूची ब्रँडचे सोया ग्रॅन्युल्स वापरले होते)
१ कप उकडलेला बटाटा, किसून
१/२ कप वाफवलेले मटार
१ किसलेले गाजर
७-८ वाफवलेली फरसबी, बारीक चिरून
१/२ कप बारीक चिरलेली कोथिंबीर
१ टिस्पून जिरेपूड
१/४ कप कांदा, पातळ उभा चिरून
१ टिस्पून आले पेस्ट
५-६ हिरव्या मिरच्या, बारीक चिरून
६-७ कढीपत्ता
२ टेस्पून बेसन
१ टिस्पून तेल
चवीनुसार मिठ
१/२ कप भाजलेला रवा
शालो फ्राईंगसाठी तेल

कृती:
१) ३ ते ४ कप पाणी उकळत ठेवावे. त्यात १ टिस्पून मिठ आणि १ कप न्युट्रेला ग्रॅन्युल्स आणि घालून ५ मिनीटे मध्यम आचेवर उकळवावे. नंतर हे ग्रॅन्युल्स चाळणीत काढून १० मिनीटे निथळत ठेवावे. १-२ वेळा थंड पाण्याने धुवून घ्यावे. पाणी निथळून गेले कि ग्रॅन्युल्स हाताने पिळून घ्यावेत. पाणी राहू देवू नयेत.
२) नॉनस्टिक पॅनमध्ये १ टिस्पून तेल गरम करावे त्यात कढीपत्ता, हिरव्या मिरच्या, आले पेस्ट घालावी. काही सेकंद परतून कांदा घालावा. कांदा परतला गेला कि त्यात बेसन घालून मंद आचेवर परतावे. बेसन निट परतले गेले कि हे मिश्रण दुसर्‍या वाडग्यात काढून ठेवावे.
३) एका मोठ्या भांड्यात शिजवलेले ग्रॅन्युल्स, उकडलेला बटाटा, वाफवलेले मटार, किसलेले गाजर, फरसबी, कोथिंबीर, जिरेपूड, बेसनाचे मिश्रण आणि चवीपुरते मिठ घालून मिक्स करावे. वाटल्यास थोडे लाल तिखट घालावे. निट मिक्स करावे.
४) वरील मिश्रणाचे मध्यम आकाराचे चपटे कटलेट करावे. भाजलेल्या रव्यामध्ये घोळवून, मध्यम आचेवर हे कटलेट शालो फ्राय करावेत.

टीप:
१) जर लसणीचा फ्लेवर आवडत असेल तर १/२ टिस्पून लसणीची पेस्ट फोडणीत घालावी.
२) भाजलेल्या रव्याऐवजी कोटींगसाठी ब्रेड क्रम्ससुद्धा वापरू शकतो.

Labels:
Nutrela Granules, Soya Granules Cutlet, Healthy Cutlet

दहीवडा - Dahi vada

Dahi Wada in English

वाढणी: साधारण १० मध्यम वडे


साहित्य:
::::वड्यांसाठी::::
पाउण कप उडदाची डाळ
१/४ कप ओल्या खोबर्‍याचे पातळ तुकडे
४-५ मिरं
चवीपुरते मिठ
२ कप पातळ ताक
तळण्यासाठी तेल
::::दही बनवण्यासाठी::::
दिड कप दही, ५-६ टेस्पून साखर, १ टिस्पून मिठ
::::वरून भुरभूरवण्यासाठी::::
मिरपूड, लाल तिखट, चाट मसाला

कृती:
१) उडीद डाळ पाण्यात ४-५ तास भिजत घालावी. ४-५ तासानंतर डाळ उपसून ठेवावी. आणि पाणी न घालता मिक्सरमध्ये बारीक वाटून घ्यावी. वाटलेले मिश्रण आपल्याला घट्टसर हवे आहे. पण अगदी गरज वाटल्यास थोडे पाणी घालावे. त्यात मिठ, ठेचलेले मिरं, आणि खोबर्‍याचे पातळ काप घालावेत.
२) वडे मध्यम आचेवर गोल आकारात किंवा मेदूवड्याच्या आकारात तळून घ्यावे. वड्यांचा आकार खुप मोठा ठेवू नये. काहीवेळेस वडे आतून कच्चे राहू शकतात.
३) पातळ ताकात थोडी साखर आणि किंचीत मिठ घालावे. यामध्ये तळलेले वडे साधारण अर्धा ते एक तास बुडवून ठेवावे.
४) तोवर वरून घालायचे दही तयार करून घ्यावे. वाडग्यात दही घ्यावे, रवीने नुसतेच घुसळून घ्यावे. मग किंचीत पाणी घालून आवश्यक तेवढा पातळपणा द्यावा. त्यात चवीनुसार साखर आणि मिठ घालावे. ढवळून घ्यावे. आणि थोडावेळ फ्रिजमध्ये गार करण्यास ठेवावे.
सर्व्ह करताना ताकात भिजवलेले वडे प्लेटमध्ये घालावेत. त्यावर दही घालून वरती चाट मसाला, मिरपूड, आणि लाल तिखट घालावे.

Labels:
Dahi Vada, Chat food, Indian Wedding Food, Dahi wada recipe, Indian Chat food

अनारसे - Anarse-Anarsa

Anarsa in English


साहित्य:
१ कप तांदूळ
१ कप किसलेला गूळ
१ चमचा तूप
खसखस
तळण्यासाठी तूप / तेल

कृती:
१) तांदूळ ३ दिवस पाण्यात भिजवावेत. प्रत्येक दिवशी पाणी बदलावे.
२) चौथ्या दिवशी चाळणीत पाघळत ठेवावे. पंच्यावर घालून कोरडे करून घ्यावेत. मिक्सरमध्ये एकदम बारीक करून घ्यावे नंतर बारीक चाळणीमधून चाळून घ्यावे.
३) किसलेला गूळ आणि १ चमचा तूप चाळलेल्या बारीक तांदूळात घालून मळावे. घट्ट मळलेला गोळा ५-६ दिवस डब्यात भरून ठेवावा. स्टिलचा डबा वापरू नये शक्यतो प्लास्टिकचा डबा वापरावा किंवा प्लास्टिक पिशवीत भरून प्लास्टिकच्या हवाबंद डब्यात ठेवावे.
४) ५-६ दिवसांनी हे पिठ बाहेर काढावे. तळण्यासाठी मध्यम आचेवर तेल / तूप गरम करावे. २-३ सुपारीएवढे गोळे करावे. पुरीसारखे लाटावे. लाटताना खसखशीवर लाटावी. हि पुरी तळताना खसखस असलेला भाग वरती ठेवावा आणि तळताना पुरीची बाजू पलटू नये, नाहीतर खसखस जळू शकते.
५) पुरी तेलात टाकल्यावर फुलते व थोडी पसरट होते त्यामुळे झारा आणि एक स्टीलचा चमचा तेलातील पुरीच्या कडेने धरावा म्हणजे पुरी तुटणार नाही व गोल राहिल.
६) अनारसे तळताना ब‍र्‍याचदा तो फसफसतो (हसतो). तेव्हा पिठाचा गोळा तसाच ठेवून द्यावा, नंतर वापरावा कारण हे पिठ ५-६ महिने सहज टिकते.
७) अनारसे मध्यम आचेवर सोनेरी रंगावर तळून काढावेत. चाळणीत उभे करून तेल निथळून जाऊ द्यावे.

Labels:
Anarasa, Anarsa, marathi Recipe, Maharashtrian Diwali Faral

पनीर वेजिटेबल पिझ्झा - Paneer Vegetable Pizza

Paneer Vegetable Pizza in English

वाढणी: १ मध्यम पिझ्झा (थिन क्रस्ट)


साहित्य:
पिझ्झा बेस:- इथे क्लिक करा

पिझ्झा सॉससाठी:- इथे क्लिक करा

टॉपिंगसाठी:
पनीर ७५ ते १०० ग्राम (साधारण १२-१५ लहान तुकडे)
१ टेस्पून दही
१/२ टिस्पून तंदूरी मसाला
१/२ टिस्पून आलेलसूण पेस्ट
१/४ ते १/२ कप कांदा, पातळ उभा चिरून
१/४ कप हिरवी भोपळी मिरची, पातळ उभी चिरून
१/४ कप लाल भोपळी मिरची, पातळ उभी चिरून
१/२ ते पाऊण कप किसलेले चिज

कृती:
पिझ्झा बेस:- इथे क्लिक करा
पिझ्झा सॉस:- इथे क्लिक करा

पनीरचे टॉपिंग
१) पनीरचे साधारण १२-१५ मध्यम तुकडे घ्यावेत.
१ टेस्पून दही + १/२ टिस्पून तंदूरी मसाला + १/२ टिस्पून आलेलसूण पेस्ट असे मिश्रण तयार करून यात पनीर घोळवून ठेवावेत साधारण १५ मिनीटे.

सर्व पदार्थांचे एकत्रिकरण (स्टेप बाय स्टेप इमेजेस)
१) सर्व पदार्थ तयार झाले कि ओव्हन ४८० F (२५० C) प्रिहिट करावे.
२) पिझ्झा बेसला तयार सॉस लावून घ्यावा त्यावर थोडे चिज घालावे.
३) त्यावर चिरलेल्या भोपळी मिरच्या आणि कांदा घालावा.( भाज्यांना आधी थोडे मिठ लावावे.)
४) नंतर मॅरिनेट केलेले पनीर घालावे, उरलेले चिज घालावे आणि साधारण ७-८ मिनीटे, किंवा चिज अगदी किंचीत ब्राऊन होईस्तोवर बेक करावे.

Labels:
Paneer Pizza, How to bake Pizza, homemade pizza, thin crust pizza recipe

पिझ्झा बेस - Pizza Base

Pizza Base in English

वाढणी : १ थिन क्रस्ट पिझ्झा बेस


साहित्य:
३/४ कप मैदा
१ टिस्पून ड्राय यिस्ट
१/२ टिस्पून साखर
१/२ टिस्पून मिठ
१/४ कप कोमट पाणी
थोडा सुका मैदा पिझ्झा लाटताना

कृती:
१) एका बोलमध्ये २ टेस्पून कोमट पाणी घ्यावे, त्यात १ टिस्पून ड्राय यिस्ट व १/२ टिस्पून साखर घालून मिक्स करावे. हे मिश्रण १० मिनीटे झाकून ठेवावे. ५ ते १० मिनीटात हे मिश्रण फेसाळेल.
२) ३/४ कप मैदा वाडग्यात घेऊन हे फेसाळलेले मिश्रण त्यात घालावे, मिठ आणि थोडे तेल घालावे. गरजेनुसार थोडे कोमट पाणी घेऊन पिठ एकदम मऊसर मळून घ्यावे (साधारण ७-८ मिनीटे) . मळलेले पिठ एकदम Elastic झाले पाहिजे. मळलेल्या पिठाच्या गोळ्याला तेलाचा हात लावून एका काचेच्या किंवा इतर कोणत्याही, बर्‍यापैकी खोलगट (साधारण ६-७ इंच ) भांड्यात ठेवून वरून निट झाकावे. उबदार ठिकाणी हे भांडे दिड तास ठेवावे म्हणजे पिठ फुगून येईल.
३) मळलेले पिठ व्यवस्थित फुगले कि ओव्हन ४८० F (२५० C) वर प्रिहीट करावे. यिस्टमुळे पिठात हवेचे बुडबुडे तयार होतात, म्हणून पिठ परत एकदा निट मळून घ्यावे (३ मिनीटे). मळताना थोडा तेलाचा हात लावावा.
४) सुका मैदा भुरभूरवून जाडसर पोळी लाटावी (१ सेमी). काट्याने (Fork) पूर्ण पोळीवर टोचावे म्हणजे बेक करताना फुगणार नाही. पोळीला वरून थोडे तेल लावावे.
५) साधारण ६-८ मिनीटे बेक करून घ्यावे.

पिझ्झा सॉसची कृती (Pizza Sauce)
पनीर पिझ्झाची कृती (Paneer Pizza)

Labels:
Pizza Base, Easy Pizza Base Recipe, Pizza Dough

मेथीच्या देठाची भजी - Methichi Bhaji

Methichya Dethachi Bhajji (English version)



साहित्य:
१ वाटी बारीक चिरलेली मेथीची देठं
१ मध्यम कांदा
अर्धी वाटी चणाडाळ
१ चमचा भरून तांदूळपिठ
१ चमचा कणिक
५-६ हिरव्या मिरच्यांची पेस्ट
३-४ लसूण पाकळ्या बारीक चिरलेल्या
१ चमचा जिरं
मिठ
तळणीसाठी तेल

कृती:
१) चणाडाळ पाण्यात ४-५ तास भिजत घालावी. नंतर अगदी थोडे पाणी घालून घट्ट पेस्ट बनवून घ्यावी.
२) कांदा बारीक चिरावा. एका वाडग्यात मेथीची चिरलेली देठं, चिरलेला कांदा, चणाडाळ पेस्ट, चवीप्रमाणे हिरवी मिरची, तांदूळ पिठ, कणिक, जिरं, लसूण आणि चवीपुरते मिठ घालून मिक्स करावे. मिश्रण भज्यांची बोंडं तेलात सोडता येतील इतपत घट्ट ठेवावे.
३) कढईत तेल गरम करून त्यात वरील मिश्रणाची बोंडं तळून घ्यावी.
चिंच गूळाच्या चटणीबरोबर किंवा नारळाच्या चटणीबरोबर हि भजी मस्त लागते.

टीप:
१) मेथी निवडताना ताजी व कोवळी मेथी निवडावी. यामुळे मेथीची देठं कोवळी मिळतील. खुप जून मेथी असेल तर देठातील धागे भजी खाताना तोंडात येतात.
२) आवडीनुसार तिखट कमीजास्त करावे.

चकली

Labels:
Methichi bhajji, methi Bonda, fenugreek pakoda, Methi Pakora, Methichya Dethachi Bhaji, Methi Pakoda

नानखटाई (शॉर्ट ब्रेड) - Nankatai (Shortbread)

Short Bread in English

साहित्य:
५ १/२ टेस्पून बटर
१/४ कप साखर (सुपरफाईन)
१/२ कप + १/८ कप मैदा
१/४ कप तांदूळ पिठ
१/८ टिस्पून बेकिंग पावडर
चिमूटभर मिठ

कृती:
१) मैदा, तांदूळ पिठ, बेकिंग पावडर आणि मिठ हे सर्व एकत्र करून ५ वेळा चाळून घ्यावे ज्यामुळे सर्व जिन्नस एकसारखे मिक्स होतील.
२) मऊसर बटर आणि साखर एकत्र करून हॅण्डमिक्सरने फेसून घ्यावे. हे मिश्रण अगदी हलके झाले पाहिजे. साधारण ८ ते १० मिनीटे फेसावे.
३) ओव्हन ३२५ degree F वर प्रिहिट करावा. फेसलेल्या मिश्रणात हळूहळू चाळलेले पिठ घालून हॅण्डमिक्सरने एकत्र करून घ्यावे. मिश्रण नरमसर आणि हलके झाले पाहिजे.
४) ओव्हनसेफ भांड्यात (pie bakeware) या मिश्रणाचा १/२ इंचाचा थर द्यावा. थराचा पृष्ठभाग समान असावा. सुरीने अलगदपणे आवडीच्या शेपमध्ये आधीच कापून त्याच्या खुणा करून ठेवाव्यात. मिश्रण बेक केल्यावर कडक होईल आणि तेव्हा जर सुरीने कापले तर शॉर्ट ब्रेडचा चुरा पडेल.
५) मिश्रण ३० ते ३५ मिनीटे किंवा शॉर्ट ब्रेडचा रंग लाईट ब्राऊन होईस्तोवर बेक करावे. बेक करून झाले कि सुरीने ज्या खुणा केल्या आहेत, तिथून परत एकदा सुरी फिरवावी. शॉर्ट ब्रेड थंड होवू द्यावे. थंड झाल्यावर वेगळे करावेत.

Labels:
Short bread, Nankhatai, nankatai, shortbread cookie recipe

ब्रेड रोल - Bread Roll

Bread Roll (English Version)

वाढणी : ५ ते ६ ब्रेड रोल


साहित्य:
५-६ ब्रेडचे स्लाईस (व्हाईट)
१ कप उकडलेल्या बटाटा फोडी
१/४ कप मटार
१/४ कप कांदा, बारीक चिरून
१/४ कप कोथिंबीर, बारीक चिरून
१/२ टिस्पून किसलेले आले
२ हिरव्या मिरच्या, बारीक चिरून
१ टिस्पून गरम मसाला
१/२ टिस्पून आमचुर पावडर
फोडणीसाठी : २ टिस्पून तेल, १/२ टिस्पून जिरे, १/४ टिस्पून हिंग, १/४ टिस्पून हळद, १/२ टिस्पून लाल तिखट
कढीपत्ता
चवीनुसार मिठ
तळण्यासाठी तेल

कृती:
१) बटाटा उकडून, सोलून त्याच्या फोडी करून घ्याव्यात. मटार वाफवून घ्यावेत.
२) कढईत तेल गरम करून जिरे, हिंग, हळद, लाल तिखट घालून फोडणी करावी. फोडणीत कढीपत्ता, हिरव्या मिरच्या आणि आले घालावे. काही सेकंद परतून कोथिंबीर घालावी, कांदा घालावा. थोडे मिठ घालून कांदा शिजेस्तोवर परतावे.
३) नंतर मटार आणि बटाटा घालून परतावे. गरम मसाला, आमचुर पावडर घालून निट मिक्स करावे. मध्यम आचेवर एक वाफ काढावी. गरजेनुसार मिठ व तिखट वाढवावे. भाजी थोडी गार होवू द्यावी.
४) ब्रेड स्लाईसच्या कडा काढून टाकाव्यात. ब्रेड हातात घेऊन त्यावर थोडे पाणी शिंपडावे आणि ब्रेड ओलसर करावा. अधिकचे पाणी ब्रेड दोन्ही हातांमध्ये चेपून काढून टाकावे. ब्रेड काळजीपूर्वक हाताळावा.



५) या ओलसर ब्रेड स्लाईसच्या मध्यभागी एक ते दिड चमचा भाजी ठेवावी व चित्रात दाखविल्याप्रमाणे फोल्ड करून रोल बनवावा. रोल एकदम छान बांधला गेला पाहिजे. आवरणाच्या फटी राहिल्या तर तेल आत जाईल आणि खाताना रोल तेलकट लागेल.
६) तयार रोल तेलात सोनेरी रंगावर तळून काढावेत.
टोमॅटो सॉसबरोबर गरम गरम सर्व्ह करावेत.

टीप:
१) स्टफिंग आपल्या आवडीनुसार वेगवेगळ्या कॉंम्बिनेशनमध्ये बनवू शकतो.

Labels:
bread roll, veg bread roll, easy bread roll recipe, stuffed bread rolls

शेंगदाण्याची उसळ - Shengadanyachi Usal

Peanuts Curry (English Version)

वाढणी : २ जणांसाठी
हि शेंगदाणा उसळ उपवासाच्या फराळी मिसळीमध्ये उत्तम लागते. फराळी मिसळीच्या रेसिपीसाठी इथे क्लिक करा.

साहित्य:
३/४ कप शेंगदाणे
१ टिस्पून तूप
१/२ टिस्पून जिरे
४ टेस्पून शेंगदाण्याचा कूट
१/२ कप पाणी
२ आमसुलं
२-३ हिरव्या मिरच्या
१ टिस्पून गूळ
चवीपुरते मिठ

कृती:
१) शेंगदाणे ५-६ तास भिजवून ठेवावे. नंतर प्रेशर कूकरमध्ये शिजवून घ्यावे. शिजवलेल्या शेंगदाण्याची उसळ करून घ्यावी.
२) उसळीसाठी आधी ४ टेस्पून शेंगदाण्याचा कूट आणि १/२ कप पाणी एकत्र मिक्सरमध्ये फिरवावे, यामुळे हे मिश्रण दाटसर होईल आणि उसळीला थोडा दाटपणा येईल.
३) नंतर पातेल्यात तूप गरम करून त्यात जिरे मिरचीची फोडणी करावी. त्यात कूटाचे मिश्रण घालावे. आवडीप्रमाणे थोडे पाणी वाढवून पातळ करून घ्यावे. यात आमसुलं, मिठ आणि गूळ घालून एक उकळी येऊ द्यावी. नंतर शिजलेले शेंगदाणे घालून मध्यम आचेवर उकळी काढावी. या उसळीला थोडा रस ठेवावा.

टीप:
१) जर तुम्ही नुसती उसळ खाणार असाल तर फोडणीमध्ये उकडलेला बटाटा किंव रताळे घातल्यास अधिक चविष्ट लागेल.

Labels:
peanut curry, shengdana usal, upavas usal

फडतरे यांची "कोल्हापूरी मिसळ" - Phadtare Misal

Phadtare's Kolhapuri Misal

कोल्हापूरातील फडतरे यांची मिसळ खुपच प्रसिद्ध आहे. मी त्यापद्धतीची मिसळ घरी बनवली होती. खुपच चविष्ट आणि चमचमीत पाककृती आहे.
त्याचा व्हिडीओ खाली दिला आहे. पण फडतरे यांनी hotel style सारखी जास्त प्रमाणावर हि मिसळ दाखवली आहे, म्हणून मी जशी मिसळ बनवली होती त्याचे प्रमाण दिलेले आहे.
पण त्यातील दोन चार जिन्नस (बडी इलायची, जाड मिठ, बेडगी मिरची तिखट, दगडफूल) घरात उपलब्ध नव्हते. त्यामुळे व्हिडिओ आणि खाली दिलेले प्रमाण याची सांगड घालून हि चविष्ट मिसळ नक्की करून पाहा.

वाढणी : ४ प्लेट

साहित्य:
::::बटाटा भाजी::::
२ ते अडीच कप बटाट्याच्या फोडी (शिजवून आणि सोलून)
३/४ कप कांदा (उभा चिरून)
२ टेस्पून तेल
फोडणीसाठी : १/४ टिस्पून मोहोरी, १/४ टिस्पून जिरे, १/२ टिस्पून हळद
३ ते ४ हिरव्या मिरच्या, बारीक चिरून
चवीपुरते मिठ
::::मटकी उसळ::::
३/४ कप मटकी (भिजवून मोड काढल्यावर दिड कप)
३/४ कप चिरलेला कांदा
१/२ कप चिरलेला टोमॅटो
१/२ टिस्पून हळद
२ टिस्पून लाल तिखट
१ टेस्पून धणेजिरे पूड
२ टिस्पून तेल
३/४ टिस्पून साखर
चवीनुसार मिठ
::::कट::::
४ टेस्पून तेल
३/४ कप उभा चिरलेला कांदा
१/२ कप चिरलेला टोमॅटो
१/२ टिस्पून हळद
२ टिस्पून लाल तिखट
१/४ कप ओला नारळ
गरम मसाला पेस्ट:
२ टेस्पून सुके खोबरे, ३ लवंगा, १ दालचिनीची लहान काडी, चिमूटभर जायफळ पूड, २ वेलची, ४ लसूण पाकळ्यांची पेस्ट, १ टिस्पून आलेपेस्ट, ३ हिरव्या मिरच्या, १ टिस्पून जिरे



Labels:
kolhapuri Misal, misal recipe, maharashtrian misal recipe, misal recipe video

फराळी मिसळ - Farali Misal

Farali Misal (English Version) (स्टेप बाय स्टेप इमेजेससाठी इथे क्लिक करा)

वाढणी : ३-४ प्लेट



साहित्य:
::::शेंगदाण्याच्या उसळीसाठी::::
३/४ कप शेंगदाणे
१ टिस्पून तूप
१/२ टिस्पून जिरे
४ टेस्पून शेंगदाण्याचा कूट
१/२ कप पाणी
२ आमसुलं
२-३ हिरव्या मिरच्या
१ टिस्पून गूळ
चवीपुरते मिठ
::::बटाट्याची भाजी::::
२ कप शिजलेल्या बटाट्याच्या फोडी
१ टिस्पून साजूक तूप
१/२ टिस्पून जिरे
३-४ हिरव्या मिरच्या
२ टेस्पून शेंगदाण्याचा कूट
१ टिस्पून लिंबाचा रस
१/२ ते १ टिस्पून साखर
चवीपुरते मिठ
::::साबुदाण्याची खिचडी::::
३/४ कप साबुदाणा
२ टिस्पून तूप
१/२ टिस्पून जिरे
३-४ हिरव्या मिरच्या
२ टेस्पून ओला नारळ
दिड ते २ टेस्पून शेंगदाण्याचा कूट
चवीपुरती साखर आणि मिठ
१ टिस्पून लिंबाचा रस
इतर साहित्य:
बटाटा सळी
चिरलेली कोथिंबीर
मिरचीचा ठेचा (मिरची + मिठ + थोडीशी जिरेपूड)
दही



कृती:
१) सर्वप्रथम शेंगदाणे ७-८ तास पाण्यात भिजत घालावेत. मिठ घालून कूकरमध्ये शिजवावेत.
२) साबुदाणे ४-५ तास भिजवावेत. उरलेले पाणी काढून टाकावे व साबुदाणे झाकून ठेवावे.

३) बटाट्याची भाजी - इथे क्लिक करा

४) शेंगदाण्याची उसळ - इथे क्लिक करा


बटाट्याची भाजी आणि शेंगदाण्याची उसळ आधी करून ठेवली तरी चालते, पण साबुदाणा खिचडी आयत्यावेळी करावी कारण साबुदाण्याची खिचडी थंड झाली कि तिची चव उतरते.

५) साबुदाणा खिचडी -
भिजवलेल्या साबुदाण्याला साखर आणि मिठ अगोदरच लावून घ्यावे. कढईत तूप गरम करून त्यात जिरे आणि चिरलेल्या मिरच्या घालाव्यात. साबुदाणे घालून परतावे. नंतर नारळ आणि शेंगदाण्याचा कूट घालून परतावे. १ वाफ काढावी. लिंबाचा रस घालून ढवळावे.

मिसळ करताना सर्व पदार्थ गरम करावेत.
प्लेट किंवा बोलमध्ये आधी १ डाव बटाट्याची भाजी, खिचडी आणि मग दाण्याची उसळ अशा क्रमाने वाढावे. लिंबू पिळावे. त्यावर बटाटा सळी घालावी कोथिंबीर घालून सर्व्ह करावे. तसेच सर्व्ह करताना बाजूला दही वाढावे.
जर तिखटपणा हवा असेल तर मिरचीचा ठेचा घालावा.

टीप:
१) जर बटाटा सळी नसेल किंवा त्याऐवजी दुसरे काही वापरायचे असेल तर घरगुती बटाट्याचा चिवडा वापरावा. तसेच बटाटा चिवडा विकतही आणू शकतो.
२) या मिसळीत बरेच वेरिएशन्स करता येतात. जसे बटाट्याच्या भाजीसारखीच सुरण-भोपळ्याची भाजी करता येते. तसेच खमंग काकडीही बनवून मिसळीत घालू शकतो.

Labels:
Maharashtrian Recipe, marathi recipe, fasting food, upvas recipe, Potato recipe, Indian food recipe