शेवग्याच्या शेंगांची आमटी - Drumstick Amati (Dal)

Drumstick Dal in English


साहित्य:
१/२ कप तूरडाळ
७ ते ८ शेवग्याच्या शेंगांचे तुकडे (४ इंचाचे)
फोडणीसाठी: १ टेस्पून तेल, १/४ टिस्पून मोहोरी, १/४ टिस्पून जिरे, १/८ टिस्पून हिंग, १/४ टिस्पून हळद
५ ते ६ कढीपत्ता पाने (Know more : Health Benefits of Curry Leaves)
४ ते ५ हिरव्या मिरच्या, उभ्या चिरून
१/४ कप खोवलेला नारळ
१/४ कप कोथिंबीर, बारीक चिरून
१ ते दिड टिस्पून गोडा मसाला
१ टेस्पून गूळ
३ ते ४ आमसुलं
चवीपुरते मिठ

कृती:
१) तूरडाळ प्रेशर-कूकरमध्ये ६ ते ७ शिट्ट्या करून शिजवून घ्यावी. नंतर शेवग्याच्या शेंगा २ ते ३ शिट्ट्या करून शिजवून घ्याव्यात. तूरडाळ आणि शेवग्याच्या शेंगा एकत्र कूकरमध्ये शिजवू नयेत, नाहीतर शेंगा जास्त शिजतील आणि फुटतील. शेंगा शिजवताना थोडे मिठ घालावे.
२) तूरडाळ वरण निट घोटून घ्यावे. पातेल्यात तेल गरम करावे. त्यात मोहोरी, जिरे, हिंग, हळद, मिरची, कढीपत्ता, नारळ घालून फोडणी करावी त्यात कोथिंबीर घालून १५ ते २० सेकंद परतावे. नंतर यात तूरडाळ घालावी गरजेनुसार पाणी घालावे.
३) आमटीला एक उकळी आली कि शिजवलेल्या शेवग्याच्या शेंगा घालाव्यात. गोडा मसाला, आमसुलं आणि मिठ घालून मध्यम आचेवर आमटी ५ मिनीटे उकळू द्यावी. नंतर गूळ घालावा आणि साधारण २ ते ३ मिनीटे उकळू द्यावी. गॅस बंद करून थोडावेळ पातेल्यावर झाकण ठेवावे.
शेवग्याची आमटी तूप-भाताबरोबर सर्व्ह करावी.

Labels:
Shevgyachya Shenganchi Amati, Drumstick dal

काळ्या वाटाण्याची आमटी - Kala Vatana Amti

Kalya Vatanyachi Amati in English


साहित्य:
एक कप काळे वाटाणे
कांदा-नारळ पेस्टसाठी: १/४ कप खवलेला ओला नारळ, १/२ कप कांदा, उभा चिरून, १ टेस्पून तेल
फोडणीसाठी
२ टेस्पून तेल, १/४ टिस्पून मोहोरी, १/२ टिस्पून जिरे, १/८ टिस्पून हिंग, १/४ टिस्पून हळद, १ टिस्पून लाल तिखट, ४ कढीपत्ता पाने
१/२ कप बारीक चिरलेला कांदा
१ टिस्पून धणेपूड
१ टिस्पून जिरेपूड
३ आमसुलं
१ टिस्पून गूळ
१ टेस्पून काळा मसाला
चवीपुरते मिठ

कृती:
१) काळे वाटाणे ८ ते १० तास भिजवावेत. नंतर पाणी काढून टाकावे आणि मोड येण्यासाठी सुती कापडात गच्चं बांधून ठेवावेत (कमीतकमी १० ते १२ तास).
२) पॅनमध्ये १ टेस्पून तेल गरम करावे. कांदा नीट परतून घ्यावा. कांदा व्यवस्थित शिजला पाहिजे, कच्चा राहू देऊ नये. नंतर नारळ घालून परतून घ्यावे. (टीप) हे मिश्रण थोडे गार झाले कि मिक्सरमध्ये बारीक पेस्ट करून घ्यावी.
३) लहान कूकरमध्ये २ टेस्पून तेल गरम करावे. त्यात मोहोरी, जिरे, हिंग, हळद, आणि कढीपत्ता घालून फोडणी करावी. त्यात भिजवून मोड आलेले वाटाणे घालून एक मिनीटभर परतावे. नंतर त्यात धणेजिरेपूड घालून परतावे. गरजेपुरते पाणी घालावे (साधारण १ ते दिड कप). चवीपुरते मिठ, काळा मसाला आणि आमसुलं घालावीत. मिक्स करून कूकर बंद करावा आणि ५ ते ७ शिट्टया किंवा वाटाणे शिजेपर्यंत शिट्ट्या कराव्यात.
४) कूकर थंड झाला कि उघडावा त्यात कांदा-नारळ पेस्ट घालून उकळी काढावी. आता गुळ घालावा. गरजेनुसार पाणी वाढवावे. चव पाहून तिखट आणि मिठ अड्जस्ट करावे.
हि वाटाण्याची आमटी गरमागरम भाताबरोबर सर्व्ह करावी.

टीप:
१) जर सुके खोबरे वापरायचा असेल तर कांदा परतायच्या आधी सुका नारळ परतावा नंतर कांदा घालावा.
२) काही जणांना कडधान्याची आमटी फोडणीला टाकून प्रेशर कूक करायला आवडत नाही. अशावेळी, आधी प्रेशरकूकरमध्ये फक्त वाटाणे मिठ घालून शिजवून घ्यावेत. आणि नेहमीच्या फोडणीसारखे, कढईत फोडणीस टाकावेत.
३) ताजा खोवलेला नारळ वापरत असाल तर आवडीनुसार जास्त घातला तरी चालेल.
४) सुके खोबरे तेलात चांगले भाजून घेतल्याने त्याचा खमंगपणा या आमटीला छान लागतो. मी ओला नारळ व सुके खोबरे वापरून दोन्ही पद्धतीने आमटी बनवली. ओल्या नारळापेक्षा सुके खोबरे या आमटीत जास्त चांगले लागते, फक्त खोबरे तेलात छान खमंग भाजले गेले पाहिले.

Labels:
Kala Vatana Amati, Vatanyachi Amti, Maharashtrian Amti, Kalya vatanyache sambhar

इडली रवा खांडवी - Idli Rava Khandavi

Idli Rava Khandvi in English


साहित्य:
१/२ कप इडली रवा
१/२ कप गूळ
१ कप पाणी (टीप)
२ चमचे तूप
१/२ टिस्पून वेलचीपूड
१/४ कप ओलं खोबरं

कृती:
१) तूपावर इडली रवा गुलाबीसर रंगावर भाजून घ्यावा. १ कप पाणी उकळवावे आणि भाजलेल्या रव्यात घालावे. १ वाफ काढावी.
२) वाफ काढून झाली कि त्यात नारळ, वेलचीपूड आणि गूळ घालावा व परत १-२ वेळा वाफ काढावी. थाळीला तूपाचा हात लावून घ्यावा. खांडवीचे मिश्रण थाळीत ओतून थापून घ्यावे. व वड्या पाडाव्यात.

टीप:
१) बाजारात इडली रवा वेगवेगळ्या क्वालिटीमध्ये मिळतो. कधीकधी बारीक असतो तर कधी जाडसर असतो. तेव्हा पाण्याचे प्रमाण पुढीलप्रमाणे कमी जास्त करावे.
बारीक रवा = १ भाग रवा : २ भाग पाणी
जाड रवा = १ भाग रवा : अडीचपट पाणी

Labels:
Idli Rava Khandvi, Khandvi recipe, Khandavi

Other Related Recipes

उपवासाची खांडवीची

डाळींबी उसळ - Dalimbi Usal

Dalimbi Usal in English

वाढणी: २ जणांसाठी



साहित्य:
३/४ कप वाल
फोडणीसाठी:
१ टेस्पून तेल, १/४ टिस्पून मोहोरी, १/२ टिस्पून जिरे, १/८ टिस्पून हिंग, १/४ टिस्पून हळद, १/२ टिस्पून लाल तिखट
४ कढीपत्ता पाने
२ टेस्पून सुका नारळ
१ टिस्पून जिरे
१ टिस्पून गूळ
२ आमसुलं
१/४ कप कोथिंबीर
२ टेस्पून ओला नारळ
चवीनुसार मिठ

कृती:
१) वाल कोमट पाण्यात १० ते १२ तास भिजत ठेवावे. नंतर पाणी काढून टाकून भिजलेले वाल मोड आणण्यासाठी पंच्यात ८ ते १० तास गच्च बांधून ठेवावे. डाळींब्यांना मोड आले कि कोमट पाण्यात १० मिनीटे टाकून ठेवावे. डाळींब्या सोलून घ्याव्यात. मोड आलेल्या डाळींब्या हाताळताना त्या अख्ख्या राहतील याची काळजी घ्यावी. साधारण सव्वा ते दिड कप डाळींब्या होतील.
२) कढईत किसलेला सुका नारळ मध्यम आचेवर भाजून घ्यावे. नंतर जिरे खरपूस भाजून घ्यावे. नंतर भाजलेला नारळ आणि भाजलेले जिरे निट कुटून घ्यावे.
३) कढईत तेल गरम करावे. त्यात १/४ टिस्पून मोहोरी घालून तडतडू द्यावी. नंतर जिरे, हिंग, हळद, आणि लाल तिखट घालून फोडणी करावी. कढीपत्ता आणि कोथिंबीर घालावी. थोडावेळ परतून डाळींब्या घालाव्यात. हलक्या हाताने परतावे. थोडा पाणी घालावे. १ ते २ टिस्पून कुटलेले जिरे-खोबरे, आमसुलं आणि मिठ घालून वाफ काढावी.
४) डाळींब्या अर्ध्या शिजल्या कि गूळ घालून वाफ काढावी. डाळींब्या खुप नाजुक असतात पटकन मोडल्या जातात म्हणून हलक्या हाताने परतावे.
उसळ तयार झाली कि ओला नारळ घालावा. गरमागरम पोळ्यांबरोबर सर्व्ह करावे.

Labels:
Dalimbyanchi Usal, Valachi Usal, Dalimbi Usal

अळिव लाडू - Alivache ladu

Alivache ladu in English

वाढणी: साधारण ६ ते ७ मध्यम लाडू


साहित्य:
१/८ कप अळीव (अळीव कुठे मिळतील? - टीप १)
१/४ कप दूध
३/४ कप गूळ
१ कप ओला नारळ

कृती:
१) अळीव गार दुधात ३-४ तास भिजत घालावेत. ३ ते ४ तासात अळीव छान फुगून येतील.
२) भिजवलेले अळीव, गूळ आणि नारळ एकत्र करून कढईत मध्यम आचेवर शिजवत ठेवावेत. मिश्रण कडेने सुटू लागले आणि मिश्रण दाटसर झाले कि लाडू वळावेत.

टीप
१) अळीव भारतामध्ये किराणा मालाच्या दुकानात मिळू शकतील. भारताबाहेर इंडीयन स्टोअर्समध्ये मिळेल.

Labels:
Healthy laddus, Aliv Ladu, Alivache Laadu

रताळे किस - Ratale Kis

Ratale Kis in English

वाढणी: २-३ जणांसाठी


साहित्य:
साडेचार कप रताळ्याचा किस (३ मोठी रताळी)
१ टेस्पून तूप
१/२ टिस्पून जिरे
४ हिरव्या मिरच्या, बारीक चिरून किंवा २-३ सुक्या लाल मिरच्या
१/४ कप कोथिंबीर
१/२ टिस्पून जिरेपूड
3 टेस्पून शेंगदाण्याचा कूट
चवीपुरते मिठ
१/२ टिस्पून साखर
२ टेस्पून कोथिंबीर
१ टेस्पून लिंबाचा रस
२ टेस्पून ओल्या नारळाचा चव

कृती:
१) रताळी स्वच्छ धुवून घ्यावीत. मी शक्यतो साले काढत नाही फक्त रताळ्यावर काळपट डाग असतील तेवढे सुरीने काढून टाकते. पण जर वाटले तर साल काढून मग किसावे. रताळी किसताना जवळ एक गार पाणी भरलेले पातेले तयार ठेवावे. अर्धे रताळे किसले कि या पाण्यात टाकावे म्हणजे किसलेले रताळे काळे पडणार नाही.
२) कढईत तूप गरम करावे त्यात जिरे, मिरच्या घालून फोडणी करावी. तसेच १/४ कप कोथिंबीर फोडणीस घालावी. लगेच पाण्यात घातलेले रताळे किस दोन्ही हातांनी पिळून कढईत टाकावे. जिरेपूड घालून निट परतावे. आधी मिठ घालू नये कारण रताळ्याचा किस शिजत आला कि बराच आळतो आणि मिठाचा अंदाज चुकू शकतो.
३) मध्यम आचेवर रताळ्याचा किस झाकण न ठेवता शिजू द्यावा. कालथ्याने निट ढवळावे. ६-७ मिनीटांत रताळ्याचा किस आळतो तसेच अर्धवट शिजतो. त्यात थोडे मिठ, साखर, शेंगदाण्याचा कूट घालून परतावे. थोडावेळ झाकण ठेवून शिजू द्यावे.
रताळ्याचा किस तयार झाला कि त्यात लिंबाचा रस, कोथिंबीर आणि खवलेला नारळ घालून दह्याबरोबर सर्व्ह करावे.

Labels:
Ratalyacha Kis, Potato hash, Indian sweet Potato hash, ratale kees

मेथीची आमटी - Methichi Amati

Methichi Amti in English

वाढणी: ३ जणांसाठी


साहित्य:
१ ते दिड कप बारीक चिरलेली मेथीची पाने
१/२ ते ३/४ कप शिजवलेले घट्ट वरण (तूरडाळ)
फोडणीसाठी:
१ टेस्पून तेल, १/८ टिस्पून मोहोरी, १/४ टिस्पून जिरे, १/८ टिस्पून हिंग, १/४ टिस्पून हळद
१/२ टिस्पून लाल तिखट किंवा २-३ हिरव्या मिरच्या
४-५ कढीपत्ता पाने
१ टिस्पून गोडा मसाला
२-३ आमसुलं
१ टिस्पून गूळ
चवीनुसार मिठ

कृती:
१) कढईत १ टेस्पून तेल गरम करावे. त्यात नेहमीप्रमाणे मोहोरी, जिरे, हिंग, हळद घालून फोडणी करावी. आवडीनुसार तिखट किंवा मिरच्या घालाव्यात. कढीपत्ता पाने घालून काही सेकंद परतावे.
२) नंतर बारीक चिरलेली मेथी घालून परतावे. गॅस मध्यम ठेवून मेथी शिजू द्यावी. मेथी शिजताना कढईवर झाकण ठेवू नये. साधारण २-३ मिनीटे मेथी परतावी. नंतर त्यात शिजवलेली डाळ घालावी. गरजेनुसार पाणी घालावे. गॅस मिडीयम हायवर ठेवावा.
३) गोडा मसाला, आमसुलं घालून ढवळावे. १ उकळी आली कि मिठ आणि गूळ घालून अजून एक-दोन वेळ उकळी काढावी.
हि मेथीची आमटी, गरमगरम तूप-भाताबरोबर खावे.

टीप:
१) आंबटपणासाठी कोकमाऐवजी चिंचेचा कोळ किंवा लिंबाचा रसही वापरू शकतो.
२) गोडा मसाला नसल्यास इतर कोणताही करी मसाला वापरू शकतो.

Labels:
Methi Amati, Maharashtrian Dal, Amti recipe, Fenugreek recipe

गोडा मसाला - Goda Masala \ Kala Masala

Goda Masala In English

वाढणी: साधारण पाऊण किलो


साहित्य:
१/२ किलो धणे
१०० ग्राम जिरे
१०० ग्राम तिळ
१५० ग्राम सुके खोबरे
५ ग्राम काळी मिरी (साधारण १०-१२ मिरे)
५ ग्राम लवंगा (साधारण १०-१२ लवंगा)
५ ग्राम दालचिनी (४ इंचाच्या २ काड्या)
५ ग्राम तमालपत्र (५ ते ६ पाने)
१० ग्राम खडा हिंग
२ चमचे मिठ
१/४ कप तेल

कृती:
१) खोबरं किसून घ्यावे व कोरडेच खमंग भाजून घ्यावे. भाजलेले खोबरे बाजूला एका ताटात काढून ठेवावे. तिळ आणि जिरे वेगवेगळे खमंग भाजून घ्यावे. दोन्ही भाजताना आच मध्यम ठेवावी म्हणजे खोबरे किंवा तिळ जळणार नाही.
२) कढईत तेल गरम करून १० ग्राम खडा हिंग तळून घ्यावे व एका वाडग्यात काढून ठेवावे.
३) नंतर त्याच तेलात लवंग, दालचिनी, तमालपत्र, आणि मिरी वेगवेगळे तळून घ्यावे. हे मसाले बाजूला काढून घ्यावे.
४) उरलेल्या तेलात धणे चांगले खमंग भाजून घ्यावे.
५) तळलेले जिन्नस (लवंग, दालचिनी, तमालपत्र, आणि मिरी) खलबत्त्यात कुटून घ्यावेत आणि मिक्सरमध्ये एकदम बारीक करावेत. धणे मिक्सरमध्ये बारीक करावेत. हिंग पूड होईस्तोवर कुटावे. जिरे मिक्सरमध्ये बारीक करावे. बारीक केलेले हे सर्व जिन्नस बारीक चाळणीतून चाळून घ्यावे. चाळणीत उरलेला जाडसर भाग परत कुटून घ्यावा आणि चाळावा.
६) भाजलेले खोबरे आणि तिळ वेगवेगळे कुटून अथवा मिक्सरमध्ये बारीक करून घ्यावे.
७) चाळलेल्या मिश्रणात भाजून कुटलेले खोबरे व तिळ मिक्स करावे. मिठ घालून निट मिक्स करून घ्यावे. तयार मसाला हवाबंद डब्यात भरून ठेवावा.

टीप:
१) हा मसाला आमटी, भरली वांगी, बाकरवडी, उसळी (चणा, मसूर, कुळीथ) मध्ये वापरल्यास खुप छान चव येते.
2) या मसाल्यात अजून काही मसाल्याचे पदार्थ जसे नागकेशर, दगडफूलही घालता येते.

Labels:
Bramhani Masala, Everyday Marathi Masala

भोपळा भरीत - Lal Bhoplyache Bharit

Bhoplyache Bharit in English

वाढणी: २ ते ३ जणांसाठी


साहित्य:
२ कप लाल भोपळ्याच्या मध्यम फोडी (साल काढून)
१/२ टिस्पून तूप
१/२ टिस्पून जिरे
३ हिरव्या मिरच्या, उभ्या चिरून
१/४ कप कोथिंबीर, बारीक चिरून
१/२ ते ३/४ कप दही
चवीनुसार मिठ, साखर

कृती:
१) भोपळ्याच्या फोडी कूकरमध्ये उकडून घ्याव्यात. थंड झाल्यावर चमच्याने मॅश करून घ्याव्यात. खुप गुठळ्या राहू देवू नये.
२) लहान कढल्यात तूप गरम करावे. तूप गरम झाले कि जिरे आणि मिरच्या घालून फोडणी करून उकडलेल्या भोपळ्यात घालावी. चवीनुसार मिठ आणि किंचीत साखर घालावी. दही आणि कोथिंबीर घालून निट मिक्स करावे.

टीप:
१) हे भरीत उपवासालाही चालते. उपवासाव्यतिरिक्त दिवशी फोडणीत हळद, हिंग, मोहोरी घातली तरी चालते.
२) शेंगदाण्याचा कूट घातल्यास चव छान येते.

Labels:
Bhoplyache Bharit, Bhopala Bharit, Pumpkin Raita, Kaddu Raita

मक्याचा चिवडा - Corn Flakes chivda

Corn Flakes Chivda in English

वाढणी: साधारण ८ कप



साहित्य:
७ कप कॉर्न फ्लेक्स (Plain) (टीप ३,४ पहा)
१/४ कप तेल
फोडणीसाठी: १/२ टिस्पून मोहोरी, १/२ टिस्पून जिरे, १/४ टिस्पून हिंग, १/२ टिस्पून हळद, १ टिस्पून लाल तिखट, ६-७ पाने कढीपत्ता
६-७ हिरव्या मिरच्या, बारीक चिरून
२/३ कप शेंगदाणे
१/४ कप बेदाणे
२ टिस्पून धणे-जिरे पूड
१ टेस्पून आमचूर पावडर
मिठ आणि साखर चवीनुसार

कृती:
१) मोठ्या पातेल्यात १/४ कप तेल गरम करावे. त्यात शेंगदाणे फ्राय करून घ्यावे. शेंगदाणे एका ताटलीत काढून ठेवावेत.
२) आच मध्यम करावी. गरम तेलात मोहोरी, जिरे, हिंग, हळद, लाल तिखट आणि हिरव्या मिरच्या घालून फोडणी करून घ्यावी. कढीपत्ता घालून तडतडू द्यावा. बेदाणे घालावेत काही सेकंद परतून शेंगदाणे आणि कॉर्नफ्लेक्स घालावेत. कॉर्नफ्लेक्स ६-७ भागात घालावेत. एकदम घालू नयेत, जेणेकरून तेल सर्व कॉर्नफ्लेक्सना लागेल.
३) गॅस एकदम मंद ठेवून चिवडा निट मिक्स करून घ्यावा. आता धणे-जिरेपूड, आमचूर पावडर, मिठ आणि साखर (मी ३ टिस्पून साखर वापरली होती) घालून मिक्स करावे.
जर नॉनस्टिक भांडे वापरत असाल आणि भांड्याला कान असतील तर दोन्ही कान पकडून चिवडा सांडू न देता सावकाशपणे पाखडावा. म्हणजे सर्व जिन्नस छान मिक्स होतील.
४) गॅस बंद करून चिवडा निवू द्यावा. चिवडा निवला कि हवाबंद डब्यात भरून ठेवावा.

टीप:
१) शेंगदाण्याप्रमाणेच सुक्या खोबर्‍याचे पातळ काप आणि चण्याचे डाळं तळून चिवड्यात वापरू शकतो.
२) जर मिरच्या वापरायच्या नसतील तर फक्त लाल तिखट वापरू शकतो.
३) काही सिरीयल्स (cereal) पातळ तर काही जरा जाड असतात (मी आणलेल्या सिरीयल्स पातळ होत्या). त्यावरती तेल किती लागेल हे अवलंबून असते, म्हणून एकावेळी सर्व सिरीयल्स तेलात न घालता एकेक कप घालावेत.
४) सिरीयल्समध्ये साखरेचे प्रमाण कमीतकमी असावे, तेव्हा सिरीयल (cereal) निवडताना खोक्यावर ’Nutrition Label' वर साखरेचे प्रमाण बघुन घ्यावे. शुगर फ्रोस्टेड सिरीयल्स (Sugar Frosted Cereals) वापरू नयेत. त्यामुळे चिवडा खुप गोड होईल.

Labels:
Corn flakes chiwada, Diwali Chivda recipe, Makyacha Chivda, Makai Chivda

अनारसे - Anarse-Anarsa

Anarsa in English


साहित्य:
१ कप तांदूळ
१ कप किसलेला गूळ
१ चमचा तूप
खसखस
तळण्यासाठी तूप / तेल

कृती:
१) तांदूळ ३ दिवस पाण्यात भिजवावेत. प्रत्येक दिवशी पाणी बदलावे.
२) चौथ्या दिवशी चाळणीत पाघळत ठेवावे. पंच्यावर घालून कोरडे करून घ्यावेत. मिक्सरमध्ये एकदम बारीक करून घ्यावे नंतर बारीक चाळणीमधून चाळून घ्यावे.
३) किसलेला गूळ आणि १ चमचा तूप चाळलेल्या बारीक तांदूळात घालून मळावे. घट्ट मळलेला गोळा ५-६ दिवस डब्यात भरून ठेवावा. स्टिलचा डबा वापरू नये शक्यतो प्लास्टिकचा डबा वापरावा किंवा प्लास्टिक पिशवीत भरून प्लास्टिकच्या हवाबंद डब्यात ठेवावे.
४) ५-६ दिवसांनी हे पिठ बाहेर काढावे. तळण्यासाठी मध्यम आचेवर तेल / तूप गरम करावे. २-३ सुपारीएवढे गोळे करावे. पुरीसारखे लाटावे. लाटताना खसखशीवर लाटावी. हि पुरी तळताना खसखस असलेला भाग वरती ठेवावा आणि तळताना पुरीची बाजू पलटू नये, नाहीतर खसखस जळू शकते.
५) पुरी तेलात टाकल्यावर फुलते व थोडी पसरट होते त्यामुळे झारा आणि एक स्टीलचा चमचा तेलातील पुरीच्या कडेने धरावा म्हणजे पुरी तुटणार नाही व गोल राहिल.
६) अनारसे तळताना ब‍र्‍याचदा तो फसफसतो (हसतो). तेव्हा पिठाचा गोळा तसाच ठेवून द्यावा, नंतर वापरावा कारण हे पिठ ५-६ महिने सहज टिकते.
७) अनारसे मध्यम आचेवर सोनेरी रंगावर तळून काढावेत. चाळणीत उभे करून तेल निथळून जाऊ द्यावे.

Labels:
Anarasa, Anarsa, marathi Recipe, Maharashtrian Diwali Faral

चकली - Chakali

Diwali Chakali Recipe in English

वेळ: ३५ मिनीटे (भाजणी तयार असल्यास)
नग: साधारण २० ते २२ मध्यम चकल्या


साहित्य:
१ कप चकलीची भाजणी
१ कप पाणी
१ टिस्पून हिंग
२ टिस्पून पांढरे तिळ
१/२ चमचा ओवा
१ टेस्पून लाल तिखट
१ टेस्पून तेल
चवीपुरते मिठ

कृती:
१) १ कप पाणी पातेल्यात उकळत ठेवावे. त्यात हिंग, लाल तिखट, तेल, ओवा, पांढरे तिळ आणि मीठ घालून ढवळावे.
२) पाणी उकळले कि गॅस बंद करावा, चकलीची भाजणी घालावी आणि ढवळावे. ७-८ मिनीटे झाकून ठेवावे.
३) कोमट पाण्याचा हात लावून पिठ मळावे.
४) चकलीच्या सो‍र्‍याला आतून तेलाचा हात लावावा म्हणजे पिठ चिकटणार नाही. सोर्‍यामध्ये चकलीच्या पिठाचा गोळा भरून चकल्या पाडाव्यात. मध्यम आचेवर चकल्या तळून घ्याव्यात.

चकल्या बिघडण्याची कारणे आणि त्यावरील उपाय

Labels:
chakali, diwali faral, murukku, Maharashtrian Chakali, chakli recipe, chakali bhajani

बिटाची कोशिंबीर - Beetachi Koshimbir

Beetroot salad in English


साहित्य:
३/४ कप किसलेले बिट (साधारण १ बिट)
१/४ कप बारीक चिरलेला कांदा
१/४ कप बारीक चिरलेला टोमॅटो
१/२ टिस्पून जिरेपूड
१ टेस्पून शेंगदाणा कूट
१ टेस्पून कोथिंबीर, बारीक चिरून
१ टिस्पून लिंबाचा रस
मिठ साखर चवीनुसार

कृती:
१) बिट शक्यतो कच्चेच घ्यावे, पण कच्च्या बिटाची चव आवडत नसेल तर कूकरमध्ये १ शिट्टी करून अगदी थोडेच शिजवून घ्यावे. जास्त शिजवू नये.
२) बिटाचे साल काढून बिट किसून घ्यावे. त्यामध्ये वरील जिन्नस एकत्र करून चमच्याने एकजीव करून घ्यावे.

जेवणात हि बिटाची कोशिंबीर तोंडीलावणी म्हणून छान लागते.

Labels:
Beetroot raita, Beetachi koshimbir, beetroot recipe, beetroot salad recipe

शिंगाडा पिठाचे लाडू - Shingada Pithache Ladu

Shingada Flour Laddoo in English

हे लाडू करायला सोप्पे आणि चविष्ट असतातच तसेच उपवासालाही चालतात.

वाढणी : ५ ते ६ लाडू


साहित्य:
१/४ कप घट्ट तूप (पातळ असेल तर १/४ कपपेक्षा जास्त आणि १/२ कपपेक्षा थोडे कमी)
१/२ कप शिंगाडा पिठ
१/२ कप साखर
१/२ टिस्पून वेलचीपूड
१ टेस्पून खारीक पूड (ऐच्छिक)
१ टेस्पून सुकं भाजलेले खोबरे (ऐच्छिक)

कृती:
१) कढईत तूप गरम करून त्यात शिंगाडा पिठ खमंग भाजून घ्यावे. शेवटी सुके खोबरे आणि खारीकपूड घालून एखाद मिनीट परतावे.
२) भाजलेले पिठ गरम असतानाच त्यात साखर, वेलचीपूड घालून लाडू वळावेत.

Label:
laadu recipe, Laddu recipe, Shingada Pithache ladu, Upvas recipe, Fasting recipe

मेथीच्या देठाची भजी - Methichi Bhaji

Methichya Dethachi Bhajji (English version)



साहित्य:
१ वाटी बारीक चिरलेली मेथीची देठं
१ मध्यम कांदा
अर्धी वाटी चणाडाळ
१ चमचा भरून तांदूळपिठ
१ चमचा कणिक
५-६ हिरव्या मिरच्यांची पेस्ट
३-४ लसूण पाकळ्या बारीक चिरलेल्या
१ चमचा जिरं
मिठ
तळणीसाठी तेल

कृती:
१) चणाडाळ पाण्यात ४-५ तास भिजत घालावी. नंतर अगदी थोडे पाणी घालून घट्ट पेस्ट बनवून घ्यावी.
२) कांदा बारीक चिरावा. एका वाडग्यात मेथीची चिरलेली देठं, चिरलेला कांदा, चणाडाळ पेस्ट, चवीप्रमाणे हिरवी मिरची, तांदूळ पिठ, कणिक, जिरं, लसूण आणि चवीपुरते मिठ घालून मिक्स करावे. मिश्रण भज्यांची बोंडं तेलात सोडता येतील इतपत घट्ट ठेवावे.
३) कढईत तेल गरम करून त्यात वरील मिश्रणाची बोंडं तळून घ्यावी.
चिंच गूळाच्या चटणीबरोबर किंवा नारळाच्या चटणीबरोबर हि भजी मस्त लागते.

टीप:
१) मेथी निवडताना ताजी व कोवळी मेथी निवडावी. यामुळे मेथीची देठं कोवळी मिळतील. खुप जून मेथी असेल तर देठातील धागे भजी खाताना तोंडात येतात.
२) आवडीनुसार तिखट कमीजास्त करावे.

चकली

Labels:
Methichi bhajji, methi Bonda, fenugreek pakoda, Methi Pakora, Methichya Dethachi Bhaji, Methi Pakoda

लसणीचे वरण - Lasaniche Varan

Garlic Dal in English

वाढणी: साधारण दिड ते २ कप (२ जणांसाठी)




साहित्य:
१/२ कप तुरडाळ
२ लसूण पाकळ्या
३ टेस्पून बारीक चिरलेली कोथिंबीर
२ हिरव्या मिरच्या
३-४ कढीपत्ता पाने
फोडणीसाठी: १ टिस्पून तेल, १/८ टिस्पून मोहोरी, १/४ टिस्पून जिरे, १/८ टिस्पून हिंग, १/४ टिस्पून हळद
२ टिस्पून लिंबाचा रस
मिठ

कृती:
१) १/२ कप तुरडाळ स्वच्छ धुवून प्रेशर कूकरमध्ये मऊसर शिजवून घ्यावी.नंतर रवीने किंवा चमच्याने घोटून घ्यावे.
२) लसणीच्या पाकळ्या सोलून बारीक चिरून घ्याव्यात. मिरच्या उभ्या चिरून घ्याव्यात.
३) कढईत तेल गरम करून मोहोरी, जिरे, हिंग, हळद, कढीपत्ता घालून फोडणी करावी. चिरलेल्या लसूण पाकळ्या आणि मिरच्या

फोडणीत घालून १५ सेकंद परतावे. कोथिंबीर घालावी आणि ५-७ सेकंद परतून घोटलेली डाळ घालावी.आवश्यकतेनुसार पाणी घालावे.मिठ घालावे. १-२ वेळा उकळी काढावी. लिंबाचा रस घालावा.
हे लसणीचे वरण गरम गरम तूप-भाताबरोबर वाढावे.

Labels:
Dal Tadka, phodaniche varan, lasun dal, lasoon dal, Maharashtrian Dal

मिरचीचे लोणचे - Mirchiche Lonche

Indian chili Pickle in English


साहित्य:
१ ते सव्वा कप हिरव्या मिरचीचे तुकडे (१ सेमी)
३ टेस्पून मिठ किंवा चवीनुसार
१/३ कप मोहोरी पावडर (लाल मोहोरी)
१/२ टेस्पून हिंग
फोडणी: १/४ कप तेल, १/२ टिस्पून मोहोरी, १/२ टिस्पून हिंग, १/२ टिस्पून हळद
१०-१२ मेथी दाणे

कृती:
१) मिरचीला आधी मिठ, हिंग लावून ठेवावे.
२) तेल तापवावे. त्यात आधी मेथीदाणे तळून घ्यावेत. बाहेर काढून कुटावेत आणि मिरचीमध्ये घालावेत.
३) त्याच तेलात मोहोरी, हिंग, हळद घालून फोडणी करावी. हि फोडणी थंड होवू द्यावी.
४) फोडणी थंड झाली कि मिरचीमध्ये ओतावी, मोहोरी पावडर घालावी. सर्व निट मिक्स करून घ्यावे.
५) स्वच्छ व कोरड्या केलेल्या काचेच्या बरणीत हि मिरची भरून ठेवावी. ८ ते १० दिवस मुरू द्यावी.
सर्व्ह करताना आयत्यावेळी लिंबाचा रस घालावा.

Labels:
Mirchi Lonache, Chili pickle, hot and spicy chili pickle, indian style chili pickle

नारळाचे लाडू - Naralache Ladu

Coconut ladu in English

सोपे आणि पटकन होणारे लाडू..

वाढणी : साधारण ८ छोटे लाडू

साहित्य:
२ कप खवलेला ताजा नारळ
१/२ कप साखर
१/२ कप दूध
१/२ टिस्पून वेलचीपूड
२ टेस्पून बदामाचे काप

कृती:
१) एका पातेल्यात खवलेला नारळ आणि दूध एकत्र करावे. मध्यम आचेवर उकळत ठेवावे.
२) घट्टसर होत आले कि साखर घालावी. पातेल्याच्या तळाला नारळ चिकटू नये म्हणून ढवळत राहावे.
३) वेलचीपूड आणि बदामाचे काप घालावे. मिश्रण घट्टसर होत आले कि गॅस बंद करावा आणि पातेले गॅसवरून उतरवावे.
४) मिश्रण थोडे कोमटसर होवू द्यावे. गरज पडल्यास थोडा तुपाचा हात घेऊन लाडू वळावेत.

टीप:
१) हे लाडू नरमसर होतात. जर थोडा घट्टपणा हवा असेल तर थोडावेळ फ्रिजमध्ये ठेवावेत आणि मग खावेत.

Labels: laddu recipe, coconut laddu recipe, naralache ladu, naral ladu

फडतरे यांची "कोल्हापूरी मिसळ" - Phadtare Misal

Phadtare's Kolhapuri Misal

कोल्हापूरातील फडतरे यांची मिसळ खुपच प्रसिद्ध आहे. मी त्यापद्धतीची मिसळ घरी बनवली होती. खुपच चविष्ट आणि चमचमीत पाककृती आहे.
त्याचा व्हिडीओ खाली दिला आहे. पण फडतरे यांनी hotel style सारखी जास्त प्रमाणावर हि मिसळ दाखवली आहे, म्हणून मी जशी मिसळ बनवली होती त्याचे प्रमाण दिलेले आहे.
पण त्यातील दोन चार जिन्नस (बडी इलायची, जाड मिठ, बेडगी मिरची तिखट, दगडफूल) घरात उपलब्ध नव्हते. त्यामुळे व्हिडिओ आणि खाली दिलेले प्रमाण याची सांगड घालून हि चविष्ट मिसळ नक्की करून पाहा.

वाढणी : ४ प्लेट

साहित्य:
::::बटाटा भाजी::::
२ ते अडीच कप बटाट्याच्या फोडी (शिजवून आणि सोलून)
३/४ कप कांदा (उभा चिरून)
२ टेस्पून तेल
फोडणीसाठी : १/४ टिस्पून मोहोरी, १/४ टिस्पून जिरे, १/२ टिस्पून हळद
३ ते ४ हिरव्या मिरच्या, बारीक चिरून
चवीपुरते मिठ
::::मटकी उसळ::::
३/४ कप मटकी (भिजवून मोड काढल्यावर दिड कप)
३/४ कप चिरलेला कांदा
१/२ कप चिरलेला टोमॅटो
१/२ टिस्पून हळद
२ टिस्पून लाल तिखट
१ टेस्पून धणेजिरे पूड
२ टिस्पून तेल
३/४ टिस्पून साखर
चवीनुसार मिठ
::::कट::::
४ टेस्पून तेल
३/४ कप उभा चिरलेला कांदा
१/२ कप चिरलेला टोमॅटो
१/२ टिस्पून हळद
२ टिस्पून लाल तिखट
१/४ कप ओला नारळ
गरम मसाला पेस्ट:
२ टेस्पून सुके खोबरे, ३ लवंगा, १ दालचिनीची लहान काडी, चिमूटभर जायफळ पूड, २ वेलची, ४ लसूण पाकळ्यांची पेस्ट, १ टिस्पून आलेपेस्ट, ३ हिरव्या मिरच्या, १ टिस्पून जिरे



Labels:
kolhapuri Misal, misal recipe, maharashtrian misal recipe, misal recipe video

फराळी मिसळ - Farali Misal

Farali Misal (English Version) (स्टेप बाय स्टेप इमेजेससाठी इथे क्लिक करा)

वाढणी : ३-४ प्लेट



साहित्य:
::::शेंगदाण्याच्या उसळीसाठी::::
३/४ कप शेंगदाणे
१ टिस्पून तूप
१/२ टिस्पून जिरे
४ टेस्पून शेंगदाण्याचा कूट
१/२ कप पाणी
२ आमसुलं
२-३ हिरव्या मिरच्या
१ टिस्पून गूळ
चवीपुरते मिठ
::::बटाट्याची भाजी::::
२ कप शिजलेल्या बटाट्याच्या फोडी
१ टिस्पून साजूक तूप
१/२ टिस्पून जिरे
३-४ हिरव्या मिरच्या
२ टेस्पून शेंगदाण्याचा कूट
१ टिस्पून लिंबाचा रस
१/२ ते १ टिस्पून साखर
चवीपुरते मिठ
::::साबुदाण्याची खिचडी::::
३/४ कप साबुदाणा
२ टिस्पून तूप
१/२ टिस्पून जिरे
३-४ हिरव्या मिरच्या
२ टेस्पून ओला नारळ
दिड ते २ टेस्पून शेंगदाण्याचा कूट
चवीपुरती साखर आणि मिठ
१ टिस्पून लिंबाचा रस
इतर साहित्य:
बटाटा सळी
चिरलेली कोथिंबीर
मिरचीचा ठेचा (मिरची + मिठ + थोडीशी जिरेपूड)
दही



कृती:
१) सर्वप्रथम शेंगदाणे ७-८ तास पाण्यात भिजत घालावेत. मिठ घालून कूकरमध्ये शिजवावेत.
२) साबुदाणे ४-५ तास भिजवावेत. उरलेले पाणी काढून टाकावे व साबुदाणे झाकून ठेवावे.

३) बटाट्याची भाजी - इथे क्लिक करा

४) शेंगदाण्याची उसळ - इथे क्लिक करा


बटाट्याची भाजी आणि शेंगदाण्याची उसळ आधी करून ठेवली तरी चालते, पण साबुदाणा खिचडी आयत्यावेळी करावी कारण साबुदाण्याची खिचडी थंड झाली कि तिची चव उतरते.

५) साबुदाणा खिचडी -
भिजवलेल्या साबुदाण्याला साखर आणि मिठ अगोदरच लावून घ्यावे. कढईत तूप गरम करून त्यात जिरे आणि चिरलेल्या मिरच्या घालाव्यात. साबुदाणे घालून परतावे. नंतर नारळ आणि शेंगदाण्याचा कूट घालून परतावे. १ वाफ काढावी. लिंबाचा रस घालून ढवळावे.

मिसळ करताना सर्व पदार्थ गरम करावेत.
प्लेट किंवा बोलमध्ये आधी १ डाव बटाट्याची भाजी, खिचडी आणि मग दाण्याची उसळ अशा क्रमाने वाढावे. लिंबू पिळावे. त्यावर बटाटा सळी घालावी कोथिंबीर घालून सर्व्ह करावे. तसेच सर्व्ह करताना बाजूला दही वाढावे.
जर तिखटपणा हवा असेल तर मिरचीचा ठेचा घालावा.

टीप:
१) जर बटाटा सळी नसेल किंवा त्याऐवजी दुसरे काही वापरायचे असेल तर घरगुती बटाट्याचा चिवडा वापरावा. तसेच बटाटा चिवडा विकतही आणू शकतो.
२) या मिसळीत बरेच वेरिएशन्स करता येतात. जसे बटाट्याच्या भाजीसारखीच सुरण-भोपळ्याची भाजी करता येते. तसेच खमंग काकडीही बनवून मिसळीत घालू शकतो.

Labels:
Maharashtrian Recipe, marathi recipe, fasting food, upvas recipe, Potato recipe, Indian food recipe