महाराष्ट्रीयन आमटी - Maharashtrian Amti

काळ्या वाटाण्याची आमटी - Kala Vatana Amti


शेवग्याच्या शेंगांची आमटी - Drumstick Amti


मेथीची आमटी - Methi Dal (Fenugreek Dal)


मूगाची आमटी - Whole Moong Dal


मसूराची आमटी - Masoor Amti (Red Lentils Dal)


इंग्लिश आमटी - English Amti (Lentils clear Soup)

शेवग्याच्या शेंगांची आमटी - Drumstick Amati (Dal)

Drumstick Dal in English


साहित्य:
१/२ कप तूरडाळ
७ ते ८ शेवग्याच्या शेंगांचे तुकडे (४ इंचाचे)
फोडणीसाठी: १ टेस्पून तेल, १/४ टिस्पून मोहोरी, १/४ टिस्पून जिरे, १/८ टिस्पून हिंग, १/४ टिस्पून हळद
५ ते ६ कढीपत्ता पाने (Know more : Health Benefits of Curry Leaves)
४ ते ५ हिरव्या मिरच्या, उभ्या चिरून
१/४ कप खोवलेला नारळ
१/४ कप कोथिंबीर, बारीक चिरून
१ ते दिड टिस्पून गोडा मसाला
१ टेस्पून गूळ
३ ते ४ आमसुलं
चवीपुरते मिठ

कृती:
१) तूरडाळ प्रेशर-कूकरमध्ये ६ ते ७ शिट्ट्या करून शिजवून घ्यावी. नंतर शेवग्याच्या शेंगा २ ते ३ शिट्ट्या करून शिजवून घ्याव्यात. तूरडाळ आणि शेवग्याच्या शेंगा एकत्र कूकरमध्ये शिजवू नयेत, नाहीतर शेंगा जास्त शिजतील आणि फुटतील. शेंगा शिजवताना थोडे मिठ घालावे.
२) तूरडाळ वरण निट घोटून घ्यावे. पातेल्यात तेल गरम करावे. त्यात मोहोरी, जिरे, हिंग, हळद, मिरची, कढीपत्ता, नारळ घालून फोडणी करावी त्यात कोथिंबीर घालून १५ ते २० सेकंद परतावे. नंतर यात तूरडाळ घालावी गरजेनुसार पाणी घालावे.
३) आमटीला एक उकळी आली कि शिजवलेल्या शेवग्याच्या शेंगा घालाव्यात. गोडा मसाला, आमसुलं आणि मिठ घालून मध्यम आचेवर आमटी ५ मिनीटे उकळू द्यावी. नंतर गूळ घालावा आणि साधारण २ ते ३ मिनीटे उकळू द्यावी. गॅस बंद करून थोडावेळ पातेल्यावर झाकण ठेवावे.
शेवग्याची आमटी तूप-भाताबरोबर सर्व्ह करावी.

Labels:
Shevgyachya Shenganchi Amati, Drumstick dal

काळ्या वाटाण्याची आमटी - Kala Vatana Amti

Kalya Vatanyachi Amati in English


साहित्य:
एक कप काळे वाटाणे
कांदा-नारळ पेस्टसाठी: १/४ कप खवलेला ओला नारळ, १/२ कप कांदा, उभा चिरून, १ टेस्पून तेल
फोडणीसाठी
२ टेस्पून तेल, १/४ टिस्पून मोहोरी, १/२ टिस्पून जिरे, १/८ टिस्पून हिंग, १/४ टिस्पून हळद, १ टिस्पून लाल तिखट, ४ कढीपत्ता पाने
१/२ कप बारीक चिरलेला कांदा
१ टिस्पून धणेपूड
१ टिस्पून जिरेपूड
३ आमसुलं
१ टिस्पून गूळ
१ टेस्पून काळा मसाला
चवीपुरते मिठ

कृती:
१) काळे वाटाणे ८ ते १० तास भिजवावेत. नंतर पाणी काढून टाकावे आणि मोड येण्यासाठी सुती कापडात गच्चं बांधून ठेवावेत (कमीतकमी १० ते १२ तास).
२) पॅनमध्ये १ टेस्पून तेल गरम करावे. कांदा नीट परतून घ्यावा. कांदा व्यवस्थित शिजला पाहिजे, कच्चा राहू देऊ नये. नंतर नारळ घालून परतून घ्यावे. (टीप) हे मिश्रण थोडे गार झाले कि मिक्सरमध्ये बारीक पेस्ट करून घ्यावी.
३) लहान कूकरमध्ये २ टेस्पून तेल गरम करावे. त्यात मोहोरी, जिरे, हिंग, हळद, आणि कढीपत्ता घालून फोडणी करावी. त्यात भिजवून मोड आलेले वाटाणे घालून एक मिनीटभर परतावे. नंतर त्यात धणेजिरेपूड घालून परतावे. गरजेपुरते पाणी घालावे (साधारण १ ते दिड कप). चवीपुरते मिठ, काळा मसाला आणि आमसुलं घालावीत. मिक्स करून कूकर बंद करावा आणि ५ ते ७ शिट्टया किंवा वाटाणे शिजेपर्यंत शिट्ट्या कराव्यात.
४) कूकर थंड झाला कि उघडावा त्यात कांदा-नारळ पेस्ट घालून उकळी काढावी. आता गुळ घालावा. गरजेनुसार पाणी वाढवावे. चव पाहून तिखट आणि मिठ अड्जस्ट करावे.
हि वाटाण्याची आमटी गरमागरम भाताबरोबर सर्व्ह करावी.

टीप:
१) जर सुके खोबरे वापरायचा असेल तर कांदा परतायच्या आधी सुका नारळ परतावा नंतर कांदा घालावा.
२) काही जणांना कडधान्याची आमटी फोडणीला टाकून प्रेशर कूक करायला आवडत नाही. अशावेळी, आधी प्रेशरकूकरमध्ये फक्त वाटाणे मिठ घालून शिजवून घ्यावेत. आणि नेहमीच्या फोडणीसारखे, कढईत फोडणीस टाकावेत.
३) ताजा खोवलेला नारळ वापरत असाल तर आवडीनुसार जास्त घातला तरी चालेल.
४) सुके खोबरे तेलात चांगले भाजून घेतल्याने त्याचा खमंगपणा या आमटीला छान लागतो. मी ओला नारळ व सुके खोबरे वापरून दोन्ही पद्धतीने आमटी बनवली. ओल्या नारळापेक्षा सुके खोबरे या आमटीत जास्त चांगले लागते, फक्त खोबरे तेलात छान खमंग भाजले गेले पाहिले.

Labels:
Kala Vatana Amati, Vatanyachi Amti, Maharashtrian Amti, Kalya vatanyache sambhar

सोलकढी - Solkadhi

Solkadhi in English

Solkadhi is a refreshing appetizer drink originated in Konkan region, Maharashtra. Solkadhi is made of Kokum fruit, Coconut milk and flavored with Garlic and Cumin. Konkani or Malvani cuisine is little spicy and solkadhi gives soothing effect after hot and spicy yet very delicious meal. Also kokum helps in digestion process.
Solkadhi is served chilled or lukewarm.

वाढणी: दिड कप


साहित्य:
७ ते ८ आमसुलं
१ कप नारळाचे दूध
१ ते २ हिरव्या मिरच्या, बारीक चिरून
२ लसूण पाकळ्या
२ टेस्पून कोथिंबीर, बारीक चिरून
१/२ टिस्पून जिरेपूड
चवीपुरते मिठ
१/२ टिस्पून तूप
१/२ टिस्पून जिरे

कृती:
१) आमसुलं १/२ कप गरम पाण्यात भिजत टाकावीत. अर्ध्या-पाऊण तासाने त्याच पाण्यात आमसुलं कुस्करून घ्यावीत आणि पाणी गाळून घ्यावे.
२) कोथिंबीर आणि मिरची एका वाडग्यात घ्यावे. त्यात किंचीत मिठ घालून हाताने किंवा चमच्याने कुस्करावे.
३) लसूण बारीक चिरून घ्यावी.
४) जिरे किंचीत कुटून घ्यावे.
फोडणी न करता सोलकढी ::::
नारळाच्या दुधात आमसुलाचे पाणी, कुस्करलेली कोथिंबीर मिरची, चिरलेली लसूण आणि कुटलेले जिरे मिक्स करावे. चवीपुरते मिठ घालावे.
फोडणी केलेली सोलकढी::::
नारळाच्या दुधात आमसुलाचे पाणी, कुस्करलेली कोथिंबीर मिरची आणि चिरलेली लसूण घालून मिक्स करावे. चवीपुरते मिठ घालावे. कढल्यात तूप गरम करून त्यात कुटलेले जिरे घालून हि फोडणी नारळ दुधाच्या मिश्रणात घालावी आणि निट मिक्स करावे.
थंडच सर्व्ह करावे किंवा अगदी मंद आचेवर कोमटसर करावे जास्त गरम करू नये. सर्व्ह करताना वरून जिरेपूड भुरभूरावी. जिरेपूड आधीच मिक्स करू नये नाहीतर सोलकढीचा रंग बदलतो.
सोलकढी नुसतीच किंवा भाताबरोबर खायलाही छान लागते.

टीप:
१) १/४ कप घट्टसर आंबट ताक घातले तर खुप छान चव येते.
२) कोकमाचे आगळ म्हणजेच साखरविरहित कोकमाचा घट्ट कोळ (Kokum Concentrate) बाजारात विकत मिळतो. ते वापरूनही सोलकढी बनवता येते.

Labels:
Solkadhi, Kokum Kadhi

दाल माखनी - Dal Makhani

Dal Makhani in English

Dal Makhani is a delicacy from Punjab in India. This Dal is cooked in lot of Butter and taste great. (Dal - Cooked Lentils and Makhani (Makkhan in hindi) - Butter)
Traditionally this dal was cooked slowly, for hours, on charcoal. This gave it a creamier texture. Traditionally cooked in a Punjabi houses, it had ‘malai’ (thick creamy skin that forms on top of milk) or fresh butter added to it. Dal Makhani can be served with Paratha, Naan, Roti or even Rice.

वाढणी: ३ ते ४ जणांसाठी

साहित्य:
१/२ कप अख्खे उडीद, सालासकट
१/४ कप राजमा (रेड बिन्स)
३ टेस्पून आलेलसूण पेस्ट
२ + २ बटर
१ टिस्पून जिरे
१/२ टिस्पून हळद
२ मध्यम टॉमेटो
१ टिस्पून गरम मसाला पावडर किंवा खडा मसाला (२ लवंगा, २ वेलची, १ तमालपत्र, १ लहान दालचिनीचा तुकडा)
१/२ कप कांदा, बारीक चिरून
२ टिस्पून लाल तिखट
१ टिस्पून धणेपूड
१ टिस्पून जिरेपूड
१/२ टिस्पून आमचूर पावडर
१/२ टिस्पून कसूरी मेथी
१/२ कप दूध
चवीपुरते मिठ
कोथिंबीर सजावटीसाठी

कृती:
१) उडीद आणि राजमा धुवून ६ ते ८ तास पाण्यात भिजवून ठेवावे. प्रेशर कूकरमध्ये भिजवलेले उडीद आणि राजमा दुप्पट पाणी घालून मऊसर शिजवून घ्यावेत. साधरण ४ ते ५ शिट्ट्या कराव्यात.
२) टॉमेटो प्युरीसाठी एक खोलगट पॅनमध्ये टॉमेटो बुडतील इतपत पाणी गरम करावे. त्यात २ टॉमेटो घालून २ मिनीटे उकळवावे आणि बाहेर काढून थंड होवू द्यावेत. साले आणि बिया काढून टाकाव्यात उरलेला भाग आणि थोडे पाणी मिक्सरमध्ये घालून प्युरी करून घ्यावी.
३) खोलगट पॅनमध्ये बटर घालून मध्यम आचेवर वितळू द्यावे. त्यात जिरे, हळद घालावी. [जर अख्खा गरम मसाला घालणार असाल तर तो आत्ता घालावा. काही सेकंद परतावे.]
४) आलेलसूण पेस्ट आणि लाल तिखट घालावे. काही सेकंद परतून त्यात चिरलेला कांदा घालून परतावे. कांदा निट परतल गेला कि टॉमेटो प्युरी घालून मध्यम आचेवर, पॅनवर झाकण ठेवून ५ ते ७ मिनीटे शिजू द्यावे. मधेमधे ढवळावे.
५) धणे-जिरेपूड घालावी आणि ढवळावे. शिजवलेले उडीद आणि राजमा घालावे. थोडावेळ मॅश करावे. गरजेपुरते पाणी घालून मधम आचेवर उकळी काढावी.
६) जर तुम्ही आख्खा गरम मसाला घातला नसेल तर आता गरम मसाला पावडर घालावी. नंतर कसूरी मेथी, मिठ आणि आमचूर पावडर घालून ढवळावे. अजून थोडे पाणी घालून घट्टपणा अड्जस्ट करावा. पॅनवर झाकण ठेवून २० ते २५ मिनीटे कमी आचेवर शिजू द्यावे. मधेमधे ढवळावे, डाळ पॅनच्या तळाला चिकटू देवू नये.
७) २ टेस्पून बटर घालून अजून १० मिनीटे वाफ काढावी. १० मिनीटांनी १/२ कप दूध घालावे आणि ढवळावे. परत झाकण ठेवून मध्यम आचेवर ५ मिनीटे वाफ काढावी.
गरम दाल मखनी कोथिंबीरीने सजवून रोटी, नान, किंवा भाताबरोबर सर्व्ह करावे.

Labels:
Dal Makhani, Malai Dal, Punjabi Dal Makhani

मेथीची आमटी - Methichi Amati

Methichi Amti in English

वाढणी: ३ जणांसाठी


साहित्य:
१ ते दिड कप बारीक चिरलेली मेथीची पाने
१/२ ते ३/४ कप शिजवलेले घट्ट वरण (तूरडाळ)
फोडणीसाठी:
१ टेस्पून तेल, १/८ टिस्पून मोहोरी, १/४ टिस्पून जिरे, १/८ टिस्पून हिंग, १/४ टिस्पून हळद
१/२ टिस्पून लाल तिखट किंवा २-३ हिरव्या मिरच्या
४-५ कढीपत्ता पाने
१ टिस्पून गोडा मसाला
२-३ आमसुलं
१ टिस्पून गूळ
चवीनुसार मिठ

कृती:
१) कढईत १ टेस्पून तेल गरम करावे. त्यात नेहमीप्रमाणे मोहोरी, जिरे, हिंग, हळद घालून फोडणी करावी. आवडीनुसार तिखट किंवा मिरच्या घालाव्यात. कढीपत्ता पाने घालून काही सेकंद परतावे.
२) नंतर बारीक चिरलेली मेथी घालून परतावे. गॅस मध्यम ठेवून मेथी शिजू द्यावी. मेथी शिजताना कढईवर झाकण ठेवू नये. साधारण २-३ मिनीटे मेथी परतावी. नंतर त्यात शिजवलेली डाळ घालावी. गरजेनुसार पाणी घालावे. गॅस मिडीयम हायवर ठेवावा.
३) गोडा मसाला, आमसुलं घालून ढवळावे. १ उकळी आली कि मिठ आणि गूळ घालून अजून एक-दोन वेळ उकळी काढावी.
हि मेथीची आमटी, गरमगरम तूप-भाताबरोबर खावे.

टीप:
१) आंबटपणासाठी कोकमाऐवजी चिंचेचा कोळ किंवा लिंबाचा रसही वापरू शकतो.
२) गोडा मसाला नसल्यास इतर कोणताही करी मसाला वापरू शकतो.

Labels:
Methi Amati, Maharashtrian Dal, Amti recipe, Fenugreek recipe

लसणीचे वरण - Lasaniche Varan

Garlic Dal in English

वाढणी: साधारण दिड ते २ कप (२ जणांसाठी)




साहित्य:
१/२ कप तुरडाळ
२ लसूण पाकळ्या
३ टेस्पून बारीक चिरलेली कोथिंबीर
२ हिरव्या मिरच्या
३-४ कढीपत्ता पाने
फोडणीसाठी: १ टिस्पून तेल, १/८ टिस्पून मोहोरी, १/४ टिस्पून जिरे, १/८ टिस्पून हिंग, १/४ टिस्पून हळद
२ टिस्पून लिंबाचा रस
मिठ

कृती:
१) १/२ कप तुरडाळ स्वच्छ धुवून प्रेशर कूकरमध्ये मऊसर शिजवून घ्यावी.नंतर रवीने किंवा चमच्याने घोटून घ्यावे.
२) लसणीच्या पाकळ्या सोलून बारीक चिरून घ्याव्यात. मिरच्या उभ्या चिरून घ्याव्यात.
३) कढईत तेल गरम करून मोहोरी, जिरे, हिंग, हळद, कढीपत्ता घालून फोडणी करावी. चिरलेल्या लसूण पाकळ्या आणि मिरच्या

फोडणीत घालून १५ सेकंद परतावे. कोथिंबीर घालावी आणि ५-७ सेकंद परतून घोटलेली डाळ घालावी.आवश्यकतेनुसार पाणी घालावे.मिठ घालावे. १-२ वेळा उकळी काढावी. लिंबाचा रस घालावा.
हे लसणीचे वरण गरम गरम तूप-भाताबरोबर वाढावे.

Labels:
Dal Tadka, phodaniche varan, lasun dal, lasoon dal, Maharashtrian Dal

आमसुलाचे सार - Amsool Saar

Amsool Saar (English version)

आमसुल पित्तशामक, पाचक तसेच भूक वाढवणारे असते. म्हणून आमसुलाचे सार जेवणाच्या आधी सूप म्हणूनही पिता येते.
आजारपणात आमसुलाचं सार प्यायल्याने तोंडाला चव येते.

वाढणी: साधारण २ कप

साहित्य:
५-६ आमसुलं
२ टिस्पून गूळ
१ टिस्पून तूप
१/४ टिस्पून जिरे
चिमूटभर हिंग
१ हिरवी मिरची बारीक चिरून
१ टेस्पून चिरलेली कोथिंबीर
दोन कप पाणी
चवीनुसार मिठ

कृती:
१) आमसुलं १/२ कप गरम पाण्यात १ तासभर भिजत घालावीत. नंतर आमसुलं त्या पाण्यात कुस्करून घ्यावी, म्हणजे आमसुलाचा अर्क पाण्यात उतरेल. हे पाणी गाळून घ्यावे। उरलेली आमसुले टाकून देऊ नयेत, त्या आमसुलांची चटणी बनवता येते.
२) या आमसुलाच्या पाण्यात दिड-दोन कप पाणी वाढवावे आणि पातेल्यात घेऊन गरम करत ठेवावे. छोट्या कढल्यात १ टिस्पून तूप गरम करावे. त्यात जिरे, हिंग, मिरचीची फोडणी करावी. हि फोडणी, गरम करत ठेवलेल्या आमसुलाच्या पाण्यात घालावी. मिठ घालावे. २ टिस्पून गूळ घालावा. कोथिंबीर घालून थोडे गरम करून गरम गरम सर्व्ह करावे.

Labels:
Kokum Saar, Amsool sar, kokum, kokum curry, kokum kadhi, kokum recipe, Maharashtrian Recipe

चण्याचे पिठले - Chanyache Pithale

Pithale (English Version)

साहित्य:
३/४ मध्यम वाटी चण्याचे पिठ
१ कांदा
३-४ लसूण पाकळ्या (ऑप्शनल)
फोडणीचे साहित्य: मोहोरी, जिरे, हिंग, १ लहान चमचा हळद, कढीपत्ता
२-३ बारीक चिरलेल्या हिरव्या मिरच्या
३-४ आमसुल
२-३ चमचे तेल
मिठ
कोथिंबीर

कृती:
१) चण्याचे पिठ पाण्यात गुठळ्या न होता मिक्स करून घ्यावे.
२) कढईत तेल गरम करून मोहोरी, जिरे हिंग, हळद, कढीपत्ता, हिरव्या मिरच्या घालून फोडणी करावी. त्यात लसूण पाकळ्या बारीक करून किंवा ठेचून घालाव्यात. बारीक चिरलेला कांदा फोडणीस घालावा.
३) कांदा निट परतला कि गॅस बारीक करून त्यात भिजवलेले चणा पिठ घालावे. लगेच थोडे पाणी घालावे. गुठळ्या न होता ढवळावे. आवश्यक तेवढा पातळपणा ठेवावा. आमसुल आणि मिठ घालून उकळी काढावी.

गरम गरम पिठले तूप भाताबरोबर झकासच लागते.

Labels:
Pithale, Maharashrian Pithale, Zunka Recipe, Pithala Recipe, Pithla Recipe

कढीगोळे - Kadhigole

Kadhi gole (English version)

वाढणी : 12 ते १५ गोळे (१ इंच आकाराचे) आणि ४ वाट्या घट्टसर कढ़ी


साहित्य:
गोळ्यांसाठी :
पाउण वाटी चणाडाळ
१ चमचा आलेलसूण पेस्ट
१ लहान चमचा मिरची पेस्ट
१/२ चमचा हिंग
१ लहान चमचा हळद
१ लहान चमचा जिरेपूड
मीठ
कढीसाठी :
२ वाट्या आंबट दही
१ चमचा भरून चणापिठ
फोडणीसाठी: २ चमचे तेल/तूप, मोहोरी, जिरे, १/२ चमचा हिंग,१ चमचा हळद
५-६ कढीपत्ता पाने
१/२ लहान चमचा आलेपेस्ट
२ लसूण पाकळ्या (ऑप्शनल)
२ हिरव्या मिरच्या
चिरलेली कोथिंबीर
१/२ चमचा साखर
मीठ


कृती:
पद्धत १
१) चणाडाळ ३-४ तास भिजत घालावी. चणाडाळ भिजली कि थोडावेळ ती निथळत ठेवावी. त्यातील पाणी निघून गेले कि त्यात आलेलसूण पेस्ट, मिरचीपेस्ट, हिंग, हळद, जिरेपूड, मीठ घालून मिक्सरमध्ये बारीक करून घ्यावे. मिक्सरमध्ये मिश्रण वाटताना पाणी घालू नये नाहीतर गोळे एकसंध राहणार नाहीत. या मिश्रणाचे एक इंचाचे घट्टा गोळे करून घ्यावे. आवश्यक तेवढा जोर देऊन गोळे घट्ट करावेत जेणेकरून ते कढीत फुटणार नाहीत.
२) दह्याचे पातळसर ताक करून घ्यावे. त्यात चणापिठ गुठळी न राहता मिक्स करावे. पातेल्यात तूप किंवा तेल गरम करावे. त्यात मोहोरी, जिरे, हिंग, हळद, कढीपत्ता, आलेपेस्ट घालून फोडणी करावी. मिरच्यांचे तुकडे घालावे. जर लसूण आवडत असेल तर २ लसूण पाकळ्या ठेचून घालाव्यात. त्यात ताक घालावे. आणि मध्यम आचेवर उकळी येईस्तोवर ढवळत राहावे. चवीपुरते मिठ आणि थोडीशी साखर घालावी.
३) कढीला उकळी आली कि आधी एक गोळा कढीत घालून बघावा जर तो फुटला नाही तर एक एक करून हळू हळू गोळे आत सोडावेत. शेवटचा गोळा घातल्यानंतर ५ मिनीटे कढीत शिजू द्यावेत. गरम गरम खायला घ्यावेत.

पद्धत २
जर वरील कृती कठीण वाटत असेल तर पुढीलप्रमाणेसुद्धा कढीगोळे बनवता येतात.
वरती दिलेल्या कृतीत गोळे थेट कढीत घातले आहेत. असे न करता एका पातेल्यात पाणी उकळत ठेवावे. त्यात हळू हळू एकेक गोळा सोडावा. आणि शेवटचा गोळा घातल्यानंतर ५ मिनीटे उकळत ठेवून गोळे शिजवावे. ते गोळे बाहेर काढून तयार कढीमध्ये घालावेत. २ मिनीटे कढी उकळावी.

टीप:
१) कढी बनवताना थोडी जास्त बनवावी कारण गोळे घातल्यावर गोळे कढी शोषून घेतात.

Labels:
Kadhi Gole, Kadhi Gola Recipe, Golyachi Kadhi, Gola Kadhi, Maharashtrian Recipe

पालकाची पातळ भाजी - Palakachi Patal bhaji

Palakachi Patal Bhaaji (English Version)

मला अळूची भाजी प्रचंड आवडते. पण या अमेरीकेतील Indian Stores मध्ये कोमेजून गेलेला अळू बघून तो घ्यावासाच नाही वाटत !! यावर माझ्या सासुबाईंनी एक मस्त आयडीया सांगितली. अळूच्याच भाजीची चव असलेली पालकाची सुद्धा भाजी करता येते !!
हि पालकाची भाजी चवीला अगदी अळूच्या भाजीसारखी लागते (अळूचे फदफदे). ज्यांना अळूची भाजी आवडते आणि अळू जर सहज उपलब्ध नसेल तर हि भाजी नक्की करून पाहा.

साहित्य:
१ जुडी पालक
१ मूठ शेंगदाणे
१ मूठ चणाडाळ
२-३ चमचे तुकडा काजू (ऑप्शनल)
फोडणीसाठी : ४ चमचे तेल, मोहोरी, हिंग, हळद, २-३ हिरव्या मिरच्या
१/२ लहान चमचा मेथी दाणे (ऑप्शनल)
१ चमचा भरून चणापिठ
१ चमचा काळा मसाला
३-४ चमचे चिंचेचा कोळ
१ ते दिड चमचा किसलेला गूळ
मिठ

कृती:
१) शेंगदाणे आणि चणाडाळ ७-८ तास पाण्यात भिजत ठेवावेत. चणाडाळ आणि शेंगदाणे भिजले कि कूकरमध्ये २-३ शिट्ट्या करून शिजवून घ्यावे. शिजवताना किंचीत मिठ घालावे.
२) पालकाची पानं खुडून ती पाण्यात स्वच्छ करून घ्यावीत. थोडावेळ मोठ्या भोकाच्या चाळणीत पाघळत ठेवावी. नंतर पाने बारीक चिरून घ्यावीत.
३) पातेल्यात तेल गरम करावे. मोहोरी, हिंग, हळद, मिरच्यांचे बारीक तुकडे, मेथीदाणे घालून फोडणी करावी. मध्यम आचेवर त्यात चिरलेला पालक घालावा. पालकाला पाणी सुटले कि त्यात चणापिठ घालावे. आणि चणापिठाबरोबर पालक चांगला घोटावा. चणापिठाच्या गुठळ्या होवू देवू नयेत. २-३ मिनीटे परतावे. चणापिठ घातल्याने पालक चांगल्याप्रकारे घोटला जातो.
४) पालक चांगला घोटला गेला कि त्यात शिजवलेले शेंगदाणे आणि चणाडाळ घालावी, आवडत असल्यास काजूचे तुकडे घालावे. काळामसाला घालावा. थोडे पाणी, चिंचेचा कोळ, मिठ, आणि गूळ घालावा. १ -२ वेळा उकळी काढावी.
हि भाजी जरा घट्टसरच असते अळूच्या भाजीसारखी त्यामुळे आवश्यक तेवढेच पाणी घालावे.

टीप:
१) या भाजीत आवडत असल्यास लसूण फोडणीत घालू शकतो.

Labels:

Spinach Curry, Indian spinach curry, Spicy spinach curry, spinach soup, healthy recipe

टोमॅटो सूप / सार - Tomato Soup

Tomato Soup (English Version)


साहित्य:
१/२ किलो टोमॅटो
१ चमचा तांदूळ पिठ
२ तमालपत्र
१ लहान चमचा जिरं
१/२ चमचा जिरपूड
१ चमचा तिखट
१ चमचा तूप
हिंग
दिड चमचा साखर
चवीपुरते मिठ
कोथिंबीर

कृती:
१) टोमॅटो कूकरमध्ये शिजवून घ्यावेत(कूकरमध्ये ३ शिट्ट्या कराव्यात). थंड झाले कि त्याची साले काढावीत.
२) तांदूळ पिठ १/२ वाटी पाण्यात गुठळ्या न होत्या कालवून घ्यावे.
३) थंड झालेल्या टोमॅटोचा देठाकडचा भाग काढून टोमॅटो मिक्सरमध्ये घालावेत त्यातच कालवलेले तांदूळपिठ, तिखट, साखर, मीठ घालावे, आणि सर्व एकत्र करून मिक्सरवर वाटून घ्यावे. हे करताना जास्तीचे पाणी घालू नये. मिश्रण मिक्सरवर फिरवल्यावर आवश्यक तेवढे पाणी घालावे.
४) ही टोमॅटोची पातळसर प्युरी चाळणीवर गाळून घ्यावी, म्हणजे टोमॅटो सूपमध्ये कसल्याच गुठळ्या, बिया राहणार नाहीत. गाळलेल्या रसात १/२ चमचा जिरपूड, २ तमालपत्र घालावे. गाळलेले मिश्रण उकळण्यासाठी पातेल्यात काढून घ्यावा.
५) लहान कढल्यात / लोखंडी पळीत १ चमचा तूप गरम करावे. जिरे, हिंग घालून फोडणी करावी. वरून टोमॅटो सूपला फोडणी द्यावी आणि थोडावेळ उकळावे. कोथिंबीर घालावी.

टीप:
१) टोमॅटो कूकरमध्ये शिजवताना थोडे जिरे घातल्यास जिर्याचा वास छान लागतो.
२) तमालपत्र फक्त उकळताना घातल्यास तमालपत्राचा उग्रपणा सूपाला लागणार नाही. जर तमालपत्र फोडणीत घातले तर त्याचा वास वरचढ होतो.
३) आवडत असल्यास वरून थोडे क्रिम घालू शकतो.
४) तांदूळपिठाऐवजी कॉर्न फ्लोरही वापरू शकतो.

इंग्लिश आमटी - English Amati

English Amti in English

इंग्लिश आमटी म्हणजेच थोडक्यात सांगायचे झाले तर डाळींचे सूप !! हि जरी आमटी असली तरी ती भाताबरोबर न खाता पावाबरोबर खातात. आणि आजारपणात किंवा तुम्ही आजारी नसलात तरीही हि आमटी नुसती प्यायलाही छान लागते.


साहित्य:
१ चमचा चणाडाळ
१ चमचा उडीदडाळ
१ चमचा तूरडाळ
१ चमचा मूगडाळ
२ मिरच्या
२-३ लसणीच्या पाकळ्या
१ लहान गाजर
१ टोमॅटो
३-४ आमसुल
तूप, जिरे, हिंग, हळद, कढीपत्ता
मीठ

कृती:
१) गाजर, टोमॅटो मध्यम आकारात चिरून घ्यावे, मिरच्या उभ्या कापून दोन तुकडे करावेत. लसणीच्या पाकळ्या ठेचून घ्याव्यात.
२) सर्व डाळी एकत्र करून धुवून घ्याव्यात. एका पातेल्यात ६-७ वाट्या पाणी घ्यावे त्यात या सर्व डाळी, गाजर, टोमॅटो, मिरच्या, लसणीच्या पाकळ्या, आमसुल घालून मंद आचेवर वरून झाकण ठेवावे.
३) मध्यम आचेवर सर्व डाळी शिजू द्याव्यात. हि आमटी पातळ असते त्यामुळे जर गॅसची आच जास्त होवून पाणी कमी झाले तर थोडे पाणी आवश्यकतेनुसार वाढवावे.
४) सर्व डाळी शिजल्या कि दुसर्‍या गॅसवर छोट्या कढल्यात तूप गरम करावे त्यात जिरे, हिंग, हळद, कढीपत्ता घालून फोडणी करावी. डाळीच्या पाण्याला वरून फोडणी द्यावी. मीठ घालावे. थोडावेळ उकळी काढावी. गरम गरमच पावाबरोबर खावी किंवा नुसतीच प्यावी.

Labels:
Dal Soup Recipe, Amati recipe, 4 Dals Soup, Lentil Soup, Spicy Lentil Soup

मूगाची आमटी - Moog Amati

Moog amati (English Version)


साहित्य:
१ वाटी हिरवे मूग
२ चमचे खवलेला नारळ
फोडणीसाठी : २ चमचे तेल, १/४ टिस्पून मोहोरी, १/४ टिस्पून जिरे, चिमुटभर हिंग, १/४ टिस्पून हळद, १ टिस्पून लाल तिखट, ३-४ कढीपत्ता पाने
२ पाकळ्या लसूण
१ लहान कांदा (ऑप्शनल)
१ लहान टोमॅटो
सुपारीएवढी चिंच
१ टिस्पून गूळ
२ टिस्पून गोडा मसाला
मीठ
कोथिंबीर

कृती:
१) मूग १०-१२ तास भिजत घालावे. पाण्यातून उपसून जाड सुती कापडात ८-१० तास गच्च बांधून मोड येऊ द्यावेत.
२) मोड आले कि त्यातील कडक राहिलेले मूग काढून टाकावे. मूग २ शिट्ट्या करून कूकरमध्ये शिजवून घ्यावे.
३) कढईत तेल गरम करावे. मोहोरी, जिरे, हिंग, हळद, लाल तिखट, कढीपत्ता,ठेचलेल्या लसूण पाकळ्या घालून फोडणी करावी. नारळ परतावा. जर कांदा वापरणार असाल तर कांदा उभा बारीक करून घालावा. कांदा परतला कि त्यात टोमॅटोच्या फोडी घालाव्यात.
४) टोमॅटो १-२ मिनीटे परतून त्यात मूग घालावे. मूग १-२ मिनीटे परतून त्यात २ भांडी पाणी, चिंच घालावी.
५) एक उकळी काढून गूळ आणि गोडा मसाला घालावा. मीठ घालावे. थोडा वेळ मध्यम आचेवर उकळू द्यावे. चिरलेली कोथिंबीर घालावी. गरम गरम तूप भाताबरोबर हि आमटी झकास लागते.

Labels:
Moong Amati, Maharashtrian Amati, moong recipe, Green Gram Recipe, Moogachi Amati

मूगाची डाळ - Moogachi dal

Moogachi dal

हि आंध्र पद्घतीची एक डाळ आहे. करायला सोपी आणि चवीला मस्तच !!


साहित्य:
१/२ कप पिवळी मूग डाळ
१ लहान कांदा
१ लहान टोमॅटो
२-३ हिरव्या मिरच्या
१ लाल सुकी मिरची
१ चमचा मद्रास करी मसाला / गरम मसाला
लिंबाचा रस / चिंच
फोडणीसाठी १ टेस्पून तेल, ३-४ कढीपत्ता, १/४ टिस्पून मोहोरी, १/४ टिस्पून जीरे, १/४ टिस्पून हिंग, १/२ टिस्पून हळद.
मिठ
कोथिंबीर

कृती:
१) कांदा टोमॅटोचे मोठ्या चौकोनी फोडी करून घ्याव्यात. कूकरमध्ये मूगाच्या डाळीत कांदा-टोमॅटोच्या फोडी घालून डाळ शिजवून घ्यावी. कांदा-टोमॅटो डाळीबरोबर शिजवल्याने छान स्वाद येतो.
२) डाळ शिजली कि रवीने एकजीव करून घ्यावी. कढईत १ चमचा तेल गरम करावे. त्यात मोहोरी, जीरे, हिंग, हळद, कढीपत्ता, मिरच्या घालून फोडणी करावी. त्यात शिजलेली मूग डाळ घालावी. हि डाळ घट्टसरच चांगली लागते त्यामुळे आवश्यक तेवढेच पाणी घालावे.
३) एक उकळी आली कि त्यात मसाला घालावा. लिंबाचा रस/ चिंचेचा कोळ आणि चवीपुरते मीठ घालावे, कोथिंबीर घालावी. गरम गरम तूप-भाताबरोबर हि डाळ मस्त लागते.

टीप:
१) जर लसणीची चव आवडत असेल तर फोडणीत लसूण बारीक चिरून घालावी.
२) चिंचेपेक्षा लिंबाचा स्वाद जास्त चांगला लागतो.

Labels:
Moong Dal recipe, Moog dal recipe, Moogachi Dal, South Indian Dal

मूग बिटाची डाळ - Moog Beetachi Dal

Moog Beetachi Dal (English Version)

भाताबरोबर आमटी हा जेवणातला अविभाज्य भाग आहे, कधीतरी आमटीऐवजी एखादा वेगळा प्रकार खायला बरे वाटते. तशीच बीटरूट घालून केलेली ही डाळीची कृती:

साहित्य:
१/२ कप हिरवी मूग डाळ
१ मध्यम बिट
१ लहान कांदा
१ मध्यम टोमॅटो
४-५ लसूण पाकळ्या बारीक चिरून
३-४ हिरव्या मिरच्या बारीक चिरून
२ टेस्पून बेसन
फोडणीसाठी: १/४ टिस्पून मोहोरी, १/४ टिस्पून जीरे, १/४ टिस्पून हिंग, १/२ टिस्पून चमचा हळद
३-४ कढिपत्ता पाने
१ टिस्पून तूप
२ टिस्पून लिंबाचा रस
दिड टिस्पून साखर
चवीपुरते मीठ
बारीक चिरलेली कोथिंबीर

कृती:
१) प्रथम मूगाची डाळ कूकरमध्ये शिजवून घ्यावी. बिटाचे तुकडे अर्धवट शिजवून घ्यावे. कांदा टोमॅटोचे चौकोनी तुकडे करून घ्यावे.
२) कढईत तूप गरम करावे. तूपात मोहोरी, जीरे, हिंग, हळद, मिरच्यांचे तुकडे, कढीपत्ता, लसूण घालून फोडणी करावी.
३) मध्यम आचेवर फोडणीमध्ये चिरलेला कांदा घालावा. कांदा परतला गेला कि त्यात टोमॅटो घालावा. २-३ मिनीटांनी अर्धवट शिजवलेले बिट घालावे. थोडेसे परतून त्यात १ कप पाणी घालावे. पाव कप पाण्यात चणा पिठ गुठळ्या न होता मिक्स करून कढईत घालावे. १२-१५ मिनीटे वाफ काढावी. सुरीने बिट शिजले आहे कि नाही ते पहावे.
४) नंतर त्यात शिजलेली मूग डाळ घालावी. ५ मिनीटं उकळी काढावी. चवीपुरते मिठ, साखर, आणि लिंबाचा रस घालावा. गरम गरम भाताबरोबर खावे. या डाळीला बिटाचा छानसा रंग येतो.


टीप:
१) या डाळीमध्ये कुठल्याही मसाल्याची आवश्यकता नसते. पण जर गरज वाटलीच तर पाव चमचा गरम मसाला किंवा करी मसाला घालावा.

Labels:
Dal Recipe, Dahl recipe, Moong Dal Recipe, Indian Dal Recipe

टोमॅटोची कढी - Tomatochi Kadhi

Tomato Kadhi


साहित्य:
६ मध्यम आकाराचे टोमॅटो
४ टेस्पून चणा पिठ (बेसन)
१/२ चमचा जीरेपूड
फोडणीसाठी १ टीस्पून तूप/ बटर, १/४ टिस्पून मोहोरी, १/४ टिस्पून जीरे, १/४ टिस्पून हिंग, १/२ टिस्पून हळद, १ टिस्पून लाल तिखट, ३-४ कढीपत्ता पाने
२ टेस्पून चिरलेली कोथिंबीर
चवीपुरती साखर, मीठ

कृती:
१) टोमॅटो शिजवून घ्यावेत. साले काढून मिक्सरमध्ये प्युरी करावी, बिया काढून टाकण्यासाठी बारीक गाळण्यामध्ये गाळून घ्यावे.
२) चणा पिठ टोमॅटो प्युरीमध्ये गुठळ्या न होता मिक्स करावे. चवीपुरते मीठ आणि साखर घालावी, लाल तिखट घालावे. चवीसाठी जीरेपूड घालावी.
३) पातेल्यात तूप गरम करावे. मोहोरी, जीरे, हिंग, हळद, कढीपत्ता घालून फोडणी करावी. त्यात बेसन घातलेली टोमॅटो प्युरी घालावी. चणा पिठ घातल्यामुळे कढीला घट्टपणा येतो. म्हणून थोडे पाणी घालून आवडीनुसार घट्टपणा adjust करावा. मध्यम आचेवर कढी शिजू द्यावी.
४) सर्व्ह करताना कढीवर चिरलेली कोथिंबीर घालावी.

मसूराची आमटी - Masoor Amati

Masoor Amati in English

भाजलेल्या मसूराची आमटी हि बनवायला सोपी तसेच जेव्हा मसूर भिजवलेले नसतील तेव्हा पटकन होण्यासारखी असते. मसूर भाजल्याने आमटीला मस्त खमंगपणा येतो. तसेच मसूर शिजल्यावर आमटी करताना विरघळतही नाहीत.


साहित्य:
१/२ कप मसूर
१ टोमॅटो
२-३ लसूण पाकळ्या
२ टेस्पून खवलेला नारळ
२ टेस्पून कोथिंबीर, बारीक चिरून
१ टिस्पून जीरेपूड
२ टिस्पून गोडा मसाला (काळा मसाला)
सुपारीएवढा गूळ
२ आमसुलं
चवीपुरते मीठ
फोडणीसाठी २ टिस्पून तेल, १/४ टिस्पून मोहोरी, १/४ टिस्पून जीरे, चिमुटभर हिंग, १/४ टिस्पून हळद, १ टिस्पून लाल तिखट, २ ते ३ कढीपत्ता

कृती:
१) सर्वप्रथम मसूर चांगले खमंग भाजावेत. (अंदाजे १५-२० मिनीटे)
२) मसूर थोडे गार झाले कि कूकरमध्ये शिजवून घ्यावे.
३) कढईत २-३ चमचे तेल घ्यावे. मोहोरी, जिरे, हिंग, हळद, लाल तिखट, कढीपत्ता तेलात घालून फोडणी करावी. लसणीच्या पाकळया ठेचून फोडणीत घालाव्या. खवलेला नारळ परतून घ्यावा. टोमॅटोच्या फोडी करून परताव्यात.
४) शिजवलेले मसूर पळीने थोडे चेचून घ्यावे. कढईत घालावे. १ ते दिड भांडे पाणी घालावे.
५) एक उकळी आल्यावर त्यात आमसूल घालावे. गोडा मसाला, मीठ आणि गूळ घालावा. मध्यम आचेवर उकळी काढावी. चिरलेली कोथिंबीर घालावी. गरम गरम भाताबरोबर गरम गरम आमटी खावी.

टीप:
१) जर गोडसर आमटी नको असेल तर आमटीत गूळ घालू नये, आणि गोडा मसाल्याऐवजी गरम मसाला किंवा करी मसाला घालावा.

Labels:
Lentil Soup, Masoor Amati, Red Lentil curry, Red Lentil soup

नारळाचे सार - Naralche Sar

Naralache Sar


साहित्य:
१ कप नारळाचे दूध
२ वाट्या आंबट ताक
३-४ हिरव्या मिरच्या बारीक चिरून
कढीपत्ता
१ चमचा तूप
जीरे
१ चमचा साखर
चवीपुरते मीठ
बारीक चिरलेली कोथिंबीर

कृती:
१) कढईत तूप गरम करून जीरे, मिरच्या, कढीपत्ता घालून फोडणी करून घ्यावी.
२) नंतर नारळाचे दूध घालावे. १ उकळी काढावी. ताक घालावे. ताक घातल्यावर उकळी येईस्तोवर ढवळावे.
३) उकळी आल्यावर चवीनुसार साखर आणि मिठ घालावे. कोथिंबीर घालावी.


चकली